— Бруней Азияда авай лап гъвечIи, амма пара девлетлу государство я. Меркез — Бандар-Сери-Бегаван.
— Уьлкведин умуми майдан 5770 квадратный километрдикай ибарат я. Ана 400 агъзур кас яшамиш жезва.
— Брунейдиз тек са уьлкведихъ — Малайзиядихъ — галаз уртах сергьят ава.
— Брунейдин тамам тIвар Бруней-Даруссалам я.
— Брунейдин агьалийрикай 85 процент кьван малайвияр ва абуруз мукьва халкьар я.
— Брунейдин агьалийрин саки са пай (тахминан 200 агъзур кас) меркезда яшамиш жезва.
— Тарихда Бруней виш йисуз кьван Великобританиядилай аслу колония яз хьана. Анжах 1984-йисалай Бруней Великобританиядин аслувиликай хкатна.
— Брунейда исятдани монархия, уьлкведин кьиле султан ава.
— Брунейдин султан Чилел алай виридалайни девлетлу кас яз гьисабзава.
— Уьлкведа сиясатдин анжах са партия ава.
— Брунейдин важиблу объектрин ва султандин къаравулда акъвазунин везифа Великобританиядин армиядин ветеранри тамамарзава.
— Брунейдин килигуниз лайихлу чкайрикай сад Бандар-Сери-Багаван шегьерда кардик квай Омар Али Сайфуддинан мискIин я. МискIин мармардин минарайрикай, къизилдин къубайрикай, къенепатан гьаятрикай, емишрин багъларикай, чар-булахрикай, муькъверикай ибарат я. МискIиндин кьилин къуба лагьайтIа, михьи къизилдикай туькIуьрнава.
— Брунейдин экономика чиликай хкудзавай менфятлу затIарихъ, кьилди къачуртIа, гзафни-гзаф нафтIадихъ галаз алакъалу я.
— Брунейда малайский чIал кьилинди я.
— 2014-йисалай Брунейда шариатдин къанунар къуватда гьатнава.
— Футбол, теннис, сквош, бадминтон ва гольф — ибур Брунейда спортдин машгьур жуьреяр я.
— Уьлкведа султандин сиясат веревирд авунал къадагъа ала. Султан сейли кас хьуниз килигна, чкадин агьалийри адан гьар са гьерекат гьахълуди яз гьисабзава.
— Брунейдиз ички квай хъвадай затIар тухунал (султандин къарардалди) 1991-йисалай инихъ къадагъа ала.
— Уьлкведа ишлемишзавай суьрсетрикай 80 процентдилай виниз къецепатай гъизвайбур я.
— Недай затIарикай Брунейда виридалайни гзаф дуьгуь машгьур я.
«Лезги газет»
