2023-йисуз дидевилин капиталдин кьадар артухарда: сад лагьай аялдиз талукь капиталдин пулунин кьадар саки 590 агъзур манатдив агакьда, кьвед лагьайдан — 780 агъзурдав кьван. И малумат РФ-дин зегьметдин ва яшайишдин рекьяй хуьнин министр Антон Котякова аялар авай хизанриз куьмекар гунин месэладиз талукь совещанидал раижна.
Мукьвара Россиядин Президент Владимир Путина къейд авурвал, дидевилин капиталдин программа къуватда амукьунин муддат 2026-йисал кьван артухар хъувунва. РикIел хкайвал, капитал 2020-йисалай инихъ сад лагьай аял хьайи хизанризни гузва.
Гекъигун патал лугьун: алай йисуз сад лагьай аялдиз талукь дидевилин капиталдин такьатрин кьадар 524,5 агъзур манатдикай ибарат я, кьвед лагьай аялдиз талукьди — 693,1 агъзур манатдикай (эгер хизанди сад лагьай аялдиз дидевилин капитал къачунвачтIа). Муькуь дуьшуьшда пулунин кьадар 168,6 агъзур манатдикай ибарат жеда.
Идалайни гъейри, 2023-йисан 1-февралдилай инвалидриз ва ветеранриз гьар вацра гузвай пулунин такьатрин кьадар, инфляциядин дережадиз килигна, артухар хъийидайвал я.
Адрес гун
Ишлемишиз вахкузвай юзан тийидай объектрин кьадар йисалай-суз артух жезва. Ихьтин объектриз адрес гун абур регистрация авунин рекье важиблу крарикай сад я.
Юзан тийидай объектдин адрес — им объект алай чка къалурзавай, тайинарзавай характеристика я. Жуван хсусиятдиз адрес къачунин гереквал аватIа, и кар квевай МФЦ-дин идарада кьилиз акъудиз жеда. Иесидив ихьтин документар хьана кIанда: паспорт; адрес тестикьарнавай распоряжение; хсусиятдин патахъай ихтиярар ава лагьай документ.
«Лезги газет»
