15-ноябрдиз Каспийский флотилиядин 300 йис тамам хьана. И лишанлу вакъиа са шумуд шегьерда къейд авуна. Мисал яз, Астрахандин центрада юбилейдиз талукьарнавай шад мярекат кьиле фена. Гьуьлерал къуллугъ кьиле тухузвайбуруз сувар мубаракдайла, Астрахандин областдин вице-губернатор Павел Паутова флотилиядин тарих рикIел хкана ва адахъ Ватан хуьнин жигьетдай авай важиблувал къейдна:
“Къе Каспийский флотилияди уьлкведин сенгерар хуьнин кардик пай кутун давамарзава, гьар юкъуз адан сергьятрин къаравулда акъвазнава, дуьньяда Урусатди кьазвай чка ва адахъ авай кесер хкажзава. Заз кьилди жуван ва гьакIни областдин губернатор Игорь Бабушкинан патай квез виридаз и баркаллу юбилей мубаракиз кIанзава. Андреевский пайдахди Волгадин ва Каспийдин винел гьамиша лепе гурай!”, — лагьана П.Паутова.
Гуьгъуьнлай мярекатдал рахай Каспийский флотилиядин командующий, контр-адмирал Александр Пешкова Урусатдин государстводин сергьятар гегьеншарунин карда I Петрди кьиле тухвай чIехи кIвалахрикай суьгьбетна.
Эхирдай иштиракчийри I Петрдин гуьмбетдал цуьквер эцигна.
Флотилиядин 300 йисан юбилейдиз бахшнавай мярекат Каспийск шегьердани тешкилнавай. Шегьердин 12-нумрадин юкьван мектебда и вакъиадиз талукьарнавай концерт кьиле фена. Мугьманриз лезгинка кьуьлер ийиз чирзавай “Арс” тIвар алай студиядин хореографиядин коллективдин куьмекдалди музыкадин “Моряна” мектебда чирвилер къачузвай аялри вижевай концерт къалурна.
Агьмед Магьмудов
