Каспийский флотилиядин 300 йис тамам хьунихъ галаз алакъалу яз, 20-ноябрдин нисинин сятдин 12-даз Каспийск шегьерда тупарай ягъун (салют) тешкилда. ТАСС-ди хабар гузвайвал, гуьгъуьнлай и кар гьар юкъуз давам хьун мумкин я.
“Каспийск шегьердин администрациядихъ ва чкадин агьалийрихъ галаз меслятар авурдалай кьулухъ гьар йикъан нисинин сятдин 12-даз са сеферда тупарай ядай адет кутаз кIанзава”, — хабар гана флотилиядин векилди ТАСС-диз.
Къейдна кIанда, гьар юкъуз тупарай ядай адет гьеле I Петрдин девирдилай ава. Жуьреба-жуьре йисара и адет кардикай хкатнай. Амма 1957-йисуз ам мад арадал хкана.
Алай вахтунда гьар юкъуз артиллериядин яракьдай ядай адет Санкт-Петербургда, Севастополда ва Владивостокда ава. И жергедик Каспийск шегьерни акатун мумкин я.
Агьмед Магьмудов
