ООН-дин къарар
ООН-дин Генассамблеяди къалмакъалрин, женгерин нетижада Украинадиз хьайи зиянар Россияди эвез хъувунин гьакъиндай къарар кьабулнава. Идакай “Новости” РИА-ди хабар гана.
И кардиз са жерге уьлквеяр акси я: Россия, Белоруссия, Китай, Куба, ЦАР, КНДР, Мали, Никарагуа, Сирия, Эритрея, Эфиопия, Иран, Зимбабве.
Разивилин сес гайибурук 94 уьлкве акатзава. 74 уьлкве сес тагана акъвазна. “Эхь” ва я “ваъ” лугьун тавуна акъвазай уьлквейрин сиягьдик Эрменистан, Сербия, Къазахстан, Къиргъизистан, Тажикистан, Узбекистан ва масабур акатзава.
Совбездин председателдин заместитель Дмитрий Медведева вичин телеграм-каналда малумарайвал, РагъакIидай патан уьлквейри къанунсуздаказ дустагънавай Россиядин эменни чуьнуьхун патал алахъунарзава.
Ада къейд авурвал, ООН-дин вири уьлквейри США-ди виликан Югославиядиз, Кореядин полуостровдиз, Вьетнамдиз ва Иракдиз гайи зиянар эвез хъувунин гьакъиндайни гьа и жуьредин къарар акъудун лазим тир. Акси дуьшуьшда, алава хъувурвал, “ихьтин тешкилат галачизни яшамиш жеда”.
Махсус серенжемдикай
Ленинграддин областда тамам тушир мобилизациядин сергьятра аваз Яракьлу Кьушунриз эвер гайибур женгиниз гьазурунин серенжемар югъдини, йифдини давам жезва. Идакай РФ-дин оборонадин министерстводин телеграм-каналди хабар гузва. Къейдзавайвал, гьазурлухвилин тарсар женгерин тежриба авай инструкторрин регьбервилик кваз кьиле физва.
15-ноябрдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 333 самолет ва 176 вертолет, зенитный ракетайрин 388 комплекс, пилот галачиз лув гудай 2511 аппарат, 6614 танк ва дяведин маса машинар, РСЗО-дин 891 машин, артиллериядин ва маса 3581 яракь, военный махсус 7227 автомашин тергна.
Санкцияр алудуниз эвер гана
КНР-дин председатель Си Цзиньпина 15-ноябрдиз G20 саммитдал рахай вахтунда недай суьрсетриз ва энергетикадин месэлайриз талукь са терефдин санкцияр къуватдай вегьиниз ва илимдинни техникадин рекьяй алакъалувилелди кIвалахар авунал эцигнавай къадагъа алудуниз эвер гана.
Къейд ийин, саммит 15-16-ноябрдиз Индонезиядин Бали островда кьиле фена. Россиядин патай ана къецепатан крарин министр Сергей Лаврова иштиракна. Ада РФ-дин ва КНР-дин сергьятриз мукьва вири мулкара пентагонди биолабораторийриз талукь программаяр кардик кутазвайдакай ихтилат кудна.
Хъел кутуна
США-дин пентагондин генерал Марк Миллиди Москвадинни Киевдин арада рахунар кьиле финин мумкинвилерикай лагьай фикирди Украинадин чиновникрик еке хъел кутуна. Идакай “Новости” РИА-ди хабар гузва.
Миллиди идалай вилик Украина гъалиб хьун мумкин туш лагьанай. Ада къейд авурвал, вилик квай хъуьтIуь Россиядихъ галаз меслят хьунин рахунар гатIундай мумкинвал ачухзава.
Украинадин кьушунрин главнокомандующий В.Залужныйди М.Миллидиз Украинадин кьушунри “гьич са рахунарни кьабулдач” лагьана. Киевдин терефдиз Россияди кьушунар ахкъудна кIанзава.
Рахунрал — къадагъа
Украинадин президент В.Зеленскийди Россиядивай есирвиле кьунвайбур вири азад хъувун истемишнай. Ада кьве терефдини сада муькуьдав вири есирар вахкун теклифна. Идалайни гъейри, ада са жерге шартIар эцигна. Мукьвара ада “Минск-3” жедач лагьана.
Зеленскийдин фикирриз РФ-дин Президентдин пресс-секретарь Д.Пескова баянар гана. Къейд авурвал, Зеленскийдин гафари Киевдин терефди рахунар кьиле тухуникай кьил къакъудзавайди тестикьарзава. Идакай “Новости” РИА-ди хабар гана.
Пескова алава хъувурвал, Россиядин тереф рахунар кьиле тухуниз гьазур тирдакай са шумудра малумарна, амма Украинадин гьукумдарри законодательный дережада и кардал къадагъа эцигнава.
Яваш хьанва
Хъсан хабаррикай сад коронавирус чукIунин гьерекат яваш хьун я. Вирус чукIунин вилик пад кьунихъ галаз женг тухузвай оперштабди 15-ноябрдиз малумарай делилралди, Россияда эхиримжи суткада коронавирус акатай 4431 кас дуьздал акъудна, абурукай 1399 начагъди азарханайра къаткурна.
«Лезги газет»
