4-ноябрдиз “Кьурагь район” МР-дин администрацияда Дагъустан Республикадин зегьметдин ва яшайишдин рекьяй вилик финин министр Абдурагьман Магьмудован, социальный идарайрин къуллугъчийрин ва хуьрерин администрацийрин векилрин иштираквал аваз яшайишдин идарайрин къуллугъчийрин кьадар тIимиларунин месэладиз талукь совещание кьиле фена. Идан гьакъиндай редакциядиз муниципалитетдин пресс-къуллугъди хабар гана.
Мярекатда гьакI РД-дин зегьметдин ва яшайишдин рекьяй вилик финин министрдин заместитель Абдулкерим Абдуллаева, “Кьурагь район” МР-дин администрациядин кьилин заместитель Рамазан Катибова, райондин ОМВД-дин начальник, полициядин подполковник Султан Къарибова, агьалияр яшайишдин рекьяй хуьдай управленидин цIийи начальник Сейфудин Къурбанова, КЦСОН-дин директор Эльбрус Гьажиева, агьалияр кIвалахралди таъминардай центрадин директор Гьажихан Гьажиханова ва маса идарайрин, организацийрин руководителри иштиракна.
Мярекатдин эвел кьиляй министр Абдурагьман Магьмудова кIватI хьанвайбур Кьурагь райондин УСЗН-дин цIийи начальник Къурбанов Сейфудинахъ галаз танишарна. Къуллугъдин жигьетдай конкурсда гъалиб хьайи Къурбанова виликдай Кьурагьрин хуьруьн администрациядин кьилин везифаяр тамамарайди я.
Идалай гуьгъуьниз министр яшайишдин идарайрин къуллугъчийрин кьадар тIимиларунин месэладал акъвазна. “УСЗН-да кIвалахзавай 77-дакай 34 кас тIимиларуниз мажбур жезва. И кар яшайишдин рекьяй гьахълувилин вири нормаяр хуьналди кьиле тухуда. Украинада кьиле физвай махсус серенжемда иштиракзавай хизанрай тирбуруз кьетIен кьезилвилер жеда. Къуллугъдикай азадзавайбурун сиягь министерствода кардик квай махсус дестеди ахтармишда”, — гъавурда туна министрди.
Гьа са вахтунда А.Магьмудова республикадин шегьеррин ва районрин яшайишдин са бязи идарайра рехъ гузвай татугайвилерихъ галаз (коррупция, ришветбазвал ва масабур) министерстводи республикадин прокуратурадихъ, ФСБ-дихъ ва МВД-дихъ галаз санал чIугвазвай женгиникай ихтилатна.
Къуллугъчийрин кьадар тIимиларунин гьакъиндай чпин фикирар КьепIиррин хуьряй тир Тамила Гьуьсейновади ва маса ксари лагьана.
Рамазан Катибова месэладин гъавурда тунай мугьманриз сагърай лагьана.
И жуьредин совещанияр райондин УСЗН-дин ва КЦСОН-дин къуллугъчийрихъ галазни кьилди-кьилди тухвана.
Абдурагьман Магьмудова Ватандин ЧIехи дяведин иштиракчидин хендеда ва Россиядин Игит Зейнудин Батманован диде Султанханум Батмановадални кьил чIугуна. Адан сагъламвиликай, райондин яшайишдин рекьяй къуллугъчийрин кIвалахдин еридикай хабарар кьуна ва яшайишда гьалтзавай жуьреба-жуьре месэлаяр гьялунин карда куьмек теклифна.
Чи мухбир
