Лезгийрин алай девирдин машгьур гьикаятчи, педагогикадин илимрин кандидат, филологиядин илимдин доктор, профессор, лезги эдебиятдин программайрин, учебникринни хрестоматийрин, илимдинни методикадин  ктабрин автор, гзаф йисара гьакъисагъвилелди хайи халкьдиз, эдебиятдиз къуллугъ ийизвай  Гьаким­ Къурбана чун вичин нубатдин энциклопедия акъудуналди шадарна.

“Лезги литература фадлай халкьдин руьгьдин игьтияжриз жаваб гузвай милли ивирдиз, руьгьдин хазинадиз, тербиячидиз элкъвенва. Чи литература вичин энциклопедия — гзаф малуматрикай ибарат чIехи ктаб — хьуниз лайихлу я”, — кхьизва алимди эвел гафуна. Дугъриданни, гьахълу гафар я. Сифте яз акъатзавай ихьтин энциклопедия чи милли литературада, зи фикирдалди, цIийи гаф я.

Хайи халкьдин эдебиятдал, медениятдал, тарихдал рикI алай алимди вичин ктаб вири терефрихъай тамамди хьун, адай кIелзавайдаз чи литературадин тарихдикай ва алай девирдикай чирвилер гун патал гзаф зегьмет чIугунвайди аквазва. Энциклопедияда лезги милли литера­турадикай, адан виш йисарин тарихдикай, илимдикай ва критикадикай, 500-лай гзаф авторрикай, чIалан алимрикайни критикрикай, гьакъикъи чешмейрал бинелу хьана, малуматар ганва.

Ктабда лезги литературадин тарих шар­­­­тIуналди 8 девирдиз пайнава,гьар кьи­ле гьар девирдин векилрикай куьруь малу­матар, писателрин шикилар, абурун эсерар, ктабар, яратмишунар ахтармишай алимрин тIварар, критикадин чешмеяр къалурнава. Ктабдин мад са кьетIенви­ли­кай лугьуз кIан­зава. Имни алимди четин гафарин манаяр ачухарун я, яни энциклопедиядикай неинки алимривай, муаллимривай, студентривай, кIелзавай аялривай, гьакIни литературадал рикI алай гьар садавай менфяткъачуз жеда лагьай чIал я.

За умуд кутазва, Гьаким Къурбана чIу­­гунвай гзаф йисарин зегьметдиз гьукуматдин дережада аваз лайихлу къимет гуда.

М.Рамазанова,

Хожа-Къазмайрин юкьван мектебдин

лезги чIалан муаллим