Тамам тушир мобилизациядин сергьятра аваз Украинада кьиле физвай махсус серенжемда иштиракзавайбуруз гузвай куьмекдин сергьятар къвердавай гегьенш жезва.
Къейд ийин хьи, уьлкведин Президент Владимир Путина 2-ноябрдиз кьабулай Указдин бинедаллаз гузвай 195 агъзур манатдилай гъейри (и такьатар икьрар кутIундай чIавуз са сеферда чара ийизва), серенжемда иштиракзавайбуруз гьа и кьадарда аваз гьар вацра гузвай пособини ава. Абурал алава яз, уьлкведин са жерге регионра дяведин рекьяй къуллугъзавайбур патал чкадин пособиярни кардик кутунва. Мисал яз, Астрахандин областда тамам тушир мобилизациядик акатнавай гьар са касдиз — 75, Брянскдин областда 200 агъзур манат гузва.
Дагъустанда республикадин дережада аваз тайинарнавай пособидин кьадарди 100 агъзур манат тешкилзава. Пулдин такьатар серенжемдин иштиракчийрин хизанрин арада паюн РД-дин зегьметдин ва яшайишдин рекьяй вилик финин министерстводин кьетIен гуьзчивилик ква.
Къейд ийин хьи, пособидилай гъейри, тамам тушир мобилизациядик акатнавайбурун аялар чирвилер гудай жуьреба-жуьре кружокриз, спортдин секцийриз пулсуздаказ кьабулзава. Абурун хизанра авай яшлубуруз ва я набутриз яшайишдин рекьяй къуллугъ авунин кьилдин къайда кьабулнава. Фронтда авайбурун хизанрин векилар кIвалахдай чкайралди сифте нубатда таъминарда.
Алай вахтунда тамам тушир мобилизациядик акатнавайбуруз виридаз пулдин такьатар ягъун патал банкдин картаяр туькIуьрзава. Пулдин такьатар абурун мукьва-кьилийрив гъиляй-гъилиз вахкудай ихтиярни ава. Мобилизациядин месэлайриз ва пулдин пособийриз талукь суалар хьайитIа, “кузвай линиядин” 122 нумрадиз зенг ийиз жеда.
Агьмед Магьмудов
