Россиядин Федерациядин Президент Владимир Путина алай йисан 21-сентябрдиз РФ-дин Яракьлу Къуватра къуллугъ авун патал тамам тушир мобилизация малумарайдалай гуьгъуьниз къуллугъ авунин жигьетдай икьрар кутIуннавай аскерриз (военнослужащийриз) са сеферда гудай 195 агъзур манатдин гьакъиндай Указдал къул чIугуна. Талукь тир документ официальный интернет-порталда чапнава. Идан гьакъиндай ТАСС-ди хабар гана.
“Россиядин Федерациядин Яракьлу Къуватра контрактдин бинедаллаз къуллугъзавай военнослужащийриз яшайишдин рекьяй алава куьмек гунин мураддалди къарар акъудзава: Россиядин Федерациядин Яракьлу Къуватриз военный къуллугъдал мобилизация авунвай РФ-дин агьалийриз, РФ-дин Яракьлу Къуватриз военный къуллугъдал эвер гана, къуллугъзавай аскерриз (Россиядин Федерациядин оборонадин министерстводик акатзавай кьилин образованидин военный вузрин, махсус пешекарвал гузвай военный организацийрин, курсантрин, аскервилин къуллугъар эвеззавайбур квачиз), РФ-дин маса агьалийриз (къецепатан) военный махсус серенжем кьиле физвай вахтунда иштиракун патал са йисан ва гьадалай гзаф вахтунда икьрар кутIуннавайбуруз са сеферда гудай 195 агъзур манат тайинарин”, — къейднава документда.
Указ 2022-йисан 21-сентябрдилай къуватда гьатнава. Адан бинедаллаз пулар гудай къайда РФ-дин Гьукуматди тайинарда.
21-сентябрдиз Президент Владимир Путина уьлкведа тамам тушир мобилизация тухунин гьакъиндай Указдал къул чIугунай. 28-октябрдиз РФ-дин оборонадин министр Сергей Шойгуди мобилизация акьалтIнавайдакай малумат гана. Шойгудин гафаралди, 300 агъзур касдиз армиядин жергейриз эвер гана. Алава мобилизация фикирда авач.
Хийир Эмиров
