Жергедин аскер Замир Агъабалаева чи десантникрин штурмовой батальондин колоннадин хатасузвал таъминарун лазим тир. Тайин тир рекьяй фидайла, адаз чинеба чи колонна гуьзетзавай миллетбазар акуна. Вичикай хабар тежедайвал, Агъабалаев маса терефдихъай далу патаз фена ва, лишандиз къачуна, душмандиз акъваз тийиз гуьлле гана. Душманрив гвай пулеметни, пуд миллетбазни та­хьай­ мисална. Пулеметчикрин патай мад куьмек агакь тавур фашистар кьулухъди катна. Вичин ви­кIегь гьерекатралди Замир Агъабалаева чи колонна душмандин чинебан гьужумдикай къутармишна.

Кас галачиз цавай лув гудай аппаратдин комплексдин оператор, старший сержант Камран Алибегова душмандин военный техника, командиррин пунк­тар, тупар алай чкаяр, диверсантринни разведчикрин дестеяр жагъурунин тапшуругъ кьилиз акъудзавай. Ингье адаз Украинадин яракьлу къуватрин бронетехникадин колонна гьужумдиз гьазур жезвайди акуна. Гьасятда сержантди чи командиррин пунк­туниз колонна алай чка ва абур физвай тереф гьим ятIа, гьадакай хабар гана. Чи сад авунвай кьушунрин артиллеристрини гежел вегьенач. Душмандин бронетехникадин колоннадиз тупарай цIай гана. Нетижада махсус вад машин тергна, чи аскерар хейлин чкадиз виликди фена.

Чпивай къакъатай чкаяр мад хкьун патал Украинадин миллетбазри тактикадин дестедикай ибарат тир чи батальонди кьунвай сенгеррал гьужумна. Сифтедай чибурун патахъ гзаф кьадарда тупарин гуьллеяр ахъайна. Батальон алакъадин жигьетдай старший лейтенант Адамов Мегьамеда таъминарзавай.

Нубатдин сеферда залп гайила, гуьлледин кIусар кьуд патахъ чкIана, радиорелейный станция къайдадикай хкатна, батальон къенепатан ва вине авай командованидихъ галаз алакъадикай магьрум хьана. Гьа са вахтунда станциядин начальник Мегьа­мед Адамовални хер хьана. Амма ада вич вичивай квадарнач ва залан хер хьанвай юлдашни саламат терефдихъ ахкъудна.

Са бубат вичин хер кутIунна, ам станция къайдадиз хкунин къайгъуда гьатна. Чизвай, дуьзгуьн алакъа авачиз командованидивай подразделенийриз дуьз тапшуругъар гуз, батальондин командирдивайни вичин гьакъикъи везифаяр кьилиз акъудиз жедач. Сагъзамай юлдашарни галаз ам станция алай чкадал фена ва ам къайдадик кухтаз гьавалат­ хьана, вичин гъилик квай аскерриз гъавурда аваз буйругъар­ гана.

Старший лейтенант Мегьамед Адамован жуьр­этлу гьерекатар себеб яз, къайдадикай хкатай алакъа кIвалахдик ахкатна ва чи подразделенийриз душмандин гьужумар алу­ду­нин карда командиррин тапшуругъар тирвал кьилиз акъу­диз куьмек гана.

Украинадин миллетбазар чпин гъиляй акъатнавай хуьр вахчун патал гьужумдиз атайла, старший сержант Казбек Алимурадова танкунин экипаждиз регьбервал гузвай. Чи мотострелокрин десте акъваз тийиз ахъайзавай гуьллейрин харцик акатна. И чIавуз  Алимурадова танк вилик гьална­ ­ва душмандин тупарин цIай вичел къачуна. Гьа идалди чи­буруз хер хьанвай аскерар саламат чкадиз хутахдай мум­кинвал гана. Старший сержантдин экипажди душмандин пуд бронемашинни тергна. Нетижада ада душмандин гьужумдиз дуьзгуьн жаваб гана, чи ротайриз виликди фидай шартIар яратмишна.

Младший сержант Камран Кьасумова женгер кьиле физвай майданра Россиядин Яракьлу къуватрин частарин ва командиррин пунктарихъ галаз алакъа таъминарунин тапшуругъ кьилиз акъудзавай. Нубатдин женгина командиррин пунктунихъ галаз авай алакъа квахьна. Яргъалди икI амукьайтIа, командованидивай арадал къвезвай гьалариз къимет гуз, душмандин терефда разведка тухузвай кас галачиз лув гудай аппаратрин операторриз лазим тупшуругъар гуз жедач ва чи частар кIеве гьатунни мумкин я.

Месэладин гъавурда хъсандиз акьур Камран Кьасумов­ вичин гъилик квай аскерар галаз алакъа туькIуьр хъийиз­ рекье гьатна. Душманди ягъунар акъвазарнавачир. Алакъа­дин линия туькIуьр хъийи­дайла, сержантдал хер хьана. ЯтIа­ни ада чIур хьанвай чка ремонт хъувуна. Алакъа кардик­ ахкатнамазди, чи артиллеристриз миллетбазар алай чкайрикай хабар гана ва душмандин техникани, аскерарни къирмишна.

Жедай хасаратвиликайни фикир тавуна, младший сержантди кьабулай серенжемри душмандин гьужум авунин къастар чIурна ва адаз хейлин зиянар гудай мумкинвал арадал гъана.

Хийир Эмиров