Алатай гьафтеда Каспийскда “Азимут” мугьманханада “Терроризмдин цIийи жуьреяр. Алай аямдин шартIара терроризмдиз аксивал ийидай къайдаяр” темадай илимдинни практикадин конференция кьиле фена. Ам тешкилайди республикадин информациядин ва печатдин агентство тир.
Мярекат “Дагинформдин” интернет-ресурсар вилик тухудай отделдин начальник Рустам Джалакьова ачухна ва кьиле тухвана. КIватI хьанвайбур Дагъустандин терроризмдиз акси комиссиядин руководитель Далгат Фейзуллаева тебрикна.
Мярекатдал республикадин информациядин ва печатдин агентстводин руководителдин заместитель Аслудин Мегьамедова гегьенш рахунар авуна. Ада алай вахтунда чи обществодиз акси къуватри чпин кIвалахда цIийи жуьреяр ишлемишзавайдакай лагьана. Мисал яз, интернетдай абуру неинки жегьилрихъ галаз алакъаяр тайинарзава, гьакI абурун арада таблигъатни тухузва. Чаз малум тир гьерекатралди, интернетдай, телефонрай терактрикай чпин тапан хабарар гуналди, абуру жемиятдин, агьалийрин арада гъулгъула твазва. Ахьтин хабарар чукIурзавайбур жагъурун патални хейлин къуватар ва вахт серфзава.
Терроризмдин идеология гегьеншарунин алахъунрин аксина талукь органри гегьенш кIвалах тухузва. И важиблу карда РД-дин информациядин ва печатдин агентстводини активвилелди иштиракзава. Терроризмдин идеологиядиз акси сайтар-каналар кардик кутазва, фильмаяр гьазурзава, конкурсар кьиле тухузва.
Веревирдер ийидай вахтунда рахайбуру, и жуьредин видеопродукциядиз килигдайвал, абур школайрив, вузрив ва ссузрив агакьарунин теклиф гана. РД-дин АТК-дин аппаратдин руководителди и теклиф кьабулна ва терроризмдин идеологиядиз акси продукция муниципалитетрал агакьарун менфятлу тирдакай лагьана.
Конференциядал Кавказдин геополитикадин клубдин секретарь-координатор, политолог Яна Амелинади “Жемият, общество пайгардикай хкудунин мураддалди ишлемишзавай “жегьре” технологийриз акси акъвазун” темадай доклад авуна ва СНГ-дин уьлквейра дегишвилер (переворот) арадал гъунин себебрикай суьгьбетна. Ада къейд авурвал, “Рангунин инкъилаб” — им РагъакIидай патан уьлквейрин гьакъикъи регьбервилик кваз, пуд лагьай къуватрин иштираквални аваз, кьилиз акъудзавай государстводин переворот я.
И жуьредин “инкъилабра”, адет хьанвайвал, гзафни-гзаф жегьилри иштиракзава. ГьикI лагьайтIа, жегьилар рекьел гъиз, абурун кьил акадариз регьят я. Идахъ галаз сад хьиз, абуруз чпин энергия, къуват ишлемишдай, харждай, чеб викIегьбур яз къалурдай мумкинвал жезва эхир. Адетдин мисал яз Чехословакияда тешкилай “бархатный инкъилаб” рикIел хкун бес я. Югославияда “бульдозеррин инкъилаб”, Гуржистанда “къизилгуьллерин инкъилаб”, Украинада “жегьре инкъилаб”, Мукьвал тир РагъэкъечIдай пата “арабрин гатфар” тешкилнай. Гуржистандани Украинада тухвай “инкъилабрин” сценарияр гьа сад хьтинбур тир. “Жегьре ин-къилабрин” технологийрин бинеда вуч ава? Гужуналди, бунтар, агьалияр гьукумдиз акси къарагъарна, гьукум гъиле кьун. Амма Белоруссиядин къанун-къайдадалди хкянавай президент тахтунай гадарна, Россиядихъ галаз дуствал хуьзвай уьлкве чпин гъилик ийиз кIанз авур абурун алахъунар кьилиз акъатнач. Вучиз лагьайтIа, халкьди президентдин тереф хвена.
Конференциядин нетижаяр РД-дин информациядин ва печатдин агентстводин руководитель Абдуразакь Жамалутдинова кьуна ва ада спикерриз сагърай лагьана.
Абад Азадов
