Россияда 1-ноябрдилай зулун призывдив эгечIнава. Идан гьакъиндай РФ-дин Яракьлу Къуватрин Генштабдин 4-управленидин начальник, контр-адмирал Владимир Цимлянскийди “Российская газета” изданидиз хабар гана.
В.Цимлянскийди малумарайвал, уьлкведа 2,5 агъзур комиссия кардик ква. Абуру жегьилар армиядин жергейриз рекье тун патал кIвалахда.
“Къейд авун лазим я хьи, алай вахтунин призывдин кампания Украинада кьиле тухузвай военный махсус серенжемдихъ галаз са алакъадани авач. Армиядин жергейриз жегьилриз эвер гунин кIвалах РФ-дин законодательстводин бинейраллаз ва къалурнавай вахтара кьиле тухуда. Армиядиз эвер гузвай чIехи пай жегьилар военный рекьяй чирвилер гузвай частариз, соединенийриз ракъурда ва абуру вад вацра алай аямдин военный техникадин рекьяй вердишвилер къачуда”, — лагьана В.Цимлянскийди. Частара чирвилер ва вердишвилер къачур призывникар тайин частариз рекье твада.
Армиядин жергейриз эвер ганвай муькуь пай, чпин образованидиз, пешекарвилин рекьяй авай алакьунриз ва сагъламвилиз килигна, талукь частара къуллугъиз ракъурда.
Контр-адмиралди лагьайвал, призывдин вири комиссийра кIвалах тухун патал герек шартIар тешкилнава. Военный комиссариатрив герек парталар, суьрсет ва маса шейэр вахтунда агакьарнава.
Газет кIелзавай диде-бубаяр патал лугьун чарасуз я, Россиядин армиядин жергейриз исятда эверзавайбуру Украинада кьиле физвай махсус серенжемда иштиракдач. ГьакI армиядин жергейра чпин къуллугъ куьтягьзавай жегьиларни аниз фидач. Абур, къуллугъдин вахт куьтягь хьанмазди, чпин диде-бубайрин патав кIвалериз хъфида.
Чи мухбир
