Гьайванрин алемда депутатрин сечкияр себеб яз катун-калтугун, гьарай-вургьай гьатна са шумуд югъ тир. И мулкара уьмуьр тухузвай жергедин агьалияр кандидатри секин тазвачир. Вуж хкяда, вуж хкядач — идакай агьалийриз гьич са къайгъуни, тафаватни авачир. Гьалар хъсанвилихъ дегиш тежедайди чизвайвиляй.
Депутатвиле кандидатар я лугьуз, гьар юкъуз жуьреба-жуьре кlеретlрикай тир са жанавур, аслан, пеленг, чакъал, маймун, сикl, кьиф ва абурун векилар къвезвай. Гьайванлухдин агьалияр лагьайтlа, парахдиз янавай хипер хьиз, беден гъуьргъуь ва япарни денг жедалди, сятералди чlехи залра ацукьзавай…
“Есиррин рейсадвал” партиядай къалурнавай кандидат тир маймундин гафар виридалайни зурбабур хьана. Ада кьве сятда вичин гаф куьтягьзавачир. Эхирдалди дурум гуз тахьай хъалхъас хъипре, вичин кlеви “кlерецдай” кьил акъудна, кандидатдиз лагьана:
— Рикlиз кьей кандидат, — вилик атана хъалхъас къиб, — эгер квекай чи депутат хьайитlа, заз анжах са тавакъу ийиз кlанзава. Куь векилри чи цларал, гьатта важиблу малуматар алай баннеррални куь шикилар алкlурнава. Гзафбур тамун агьалийри къазунна, а цларик гьакlан лацу чарарин кьатlар кума. Эгер квекай депутат хьайитlа, къуй а шикилар алкlурнавай чкаяр михьи хъувурай.
Куругъли Ферзалиев
