Махачкъала шегьерда кардик квай жемиятдин улакьрин (общественный транспорт) къурулушда дегишвилер кьиле тухудайвал я. Идакай мукьвара Дагъустандин Гьукуматда кьиле фейи заседанидал республикадин вице-премьер Ризван Гъазимегьамедова хабар гана.
Кьилди къачуртIа, ада талукь идарайриз схемадин жуьреда республикадин меркездин жемиятдин улакьрин къурулушдиз талукь малуматар, автобусрин алакъайрал гуьзчивал тухузвай улакьрин асул карханайрин гьакъиндай справка гьазурун ва абурун кIвалахдиз къимет гун буйругъна.
“РФ-дин Внешэкономбанкдин государстводин программада шегьердин электричестводин куьмекдалди кIвалахзавай жемиятдин улакьрин къурулуш цIийи хъувуниз талукь гьихьтин положенияр аватIа чирна кIанда. “Хатасуз ва хъсан еридин рекьер” программадик вуч кутунватIа, вуч кухтаз жедатIа тайинарун лазим я. Алай йисуз чна агломерация цIийи хъувунин гьакъиндай мярекатра иштиракна, амма бязи кимивилер авайвиляй, Махачкъала шегьер субсидияр чара ийизвай программадик акатнач. Герек тир нетижаяр кьуна, къведай йисуз республикадин меркез чарасуз и программадик акатдайвал авунихъ еке метлеб ава”, — лагьана Р.Гъазимегьамедова ва и месэлайрин патахъай Махачкъала шегьердин администрациядизни РД-дин транспортдин ва рекьерин майишатдин министерстводиз са жерге тапшуругъар гана.
Къейд ийин хьи, алай вахтунда Махачкъаладин мулкарал 69 маршрут кардик ква. Улакьрин паркуна 1150 уьлчме ава, абурукай 34 троллейбусар я. Амма и кьадардивай чкадин агьалийрин игьтияжар тамамвилелди таъминариз жезвач. И кардихъ галаз алакъалу яз, улакьрин къурулушда цIийивилер тунин месэла кар алайбурукай сад яз амукьзава.
Чи мухбир
