И йикъара Каспийскдин ОМОН арадал атана 23 йис тамам хьуниз талукьарнавай мярекат кьиле фена. Идакай “Лезги газетдиз” РФ-дин Дагъустан Республикада авай милли гвардиядин федеральный къуллугъдин Управленидин пресс-къуллугъди хабар гана. Ана Росгвардиядин территориальный Управленидин начальник, полициядин полковник Александр Орехова, адан заместителар тир Георгий Котова ва Башир Алимова, Каспийскдин ОМОН-дин командир Шамил Магомаева, отряддин къуллугъчийри ва ветеранри иштиракна.
Александр Орехова омоновчийрин ва къуллугъдин ветеранрин тIварцIихъ тебрикдин чими келимаяр лагьана. ОМОН-дин везифайрикай, отряд арадал атуникай, фейи рекьикай куьрелди суьгьбетдайла, амай вири подразделенийрин арада и къурулушди лайихлу чка кьазвайди, ватандашрин уьмуьр ва сагъламвал хуьн патал, чпин чанарилайни гъил къачуна, гьар юкъуз тахсиркарвилерихъ галаз женг чIугвазвайди къейдна. Къуллугъ кьиле тухузвай гьалдай, женгинин стхавилин баркаллу адетар хуьнай сагърай лагьана. Чпин къуллугъдин ва уьмуьрдин девлетлу тежрибадалди абуру жегьилриз ватанпересвилин тербия гуз куьмекзавайди къейдна. КIвалахдин везифаяр кьилиз акъуддайла телеф хьайи ксар, са декьикьада кисна акъвазуналди, рикIел хкана. Абуруз хкажнавай мемориалдал цуьквер эцигна.
Мярекатдин сергьятра аваз кIвалахда тафаватлу хьайи къуллугъчийриз чухсагъул малумарна ва къиметлу пишкешар гана.
Рагнеда Рамалданова
