РД-дин транспортдин ва рекьерин майишатдин министерстводин госпрограммадин сергьятра аваз СтIал Сулейманан районда автомашинрин рекьин 3 километрдин мензилда ремонтдин кIвалахар кьиле тухузва, хабар гузва министерстводин информациядин къуллугъди. Идаради гъавурда твазвайвал, ихтилат “Курхуьр-КIварчагъ-Сиртыч” шегьредин 0-3 — километрдин участокдикай физва.
И рекьи СтIал Сулейманан райондин са кьадар хуьрер райцентр тир Кьасумхуьруьхъ галаз алакъалу ийизва ва республикадин мукьвал-мукьвал ишлемишзавай рекьерин сетдик акатзава. И шегьре гьакIни СтIал Сулейманан ва Табасаран районар алакъалу ийизвай виридалайни куьруь рехъ я.
Ремонтдин кIвалахрин сергьятра аваз шегьре авайдалай гегьеншарда, адан бине мягькемарда, асфальтдинни бетондин къат цIийи хъийида, адахъ маса рекьер галкIанвай 18 чка, гьакIни тIебии тушир тадаракар, гьа гьисабдай яз 1 муьгъ, яд ахъайдай 15 турба ва Курхуьруьн мулкунилай чIугунвай асбестдинни цементдин хвалар туькIуьр хъийида.
Къенин йикъан делилралди, тIебии тушир тадаракар ремонт авунин кIвалахар акьалтIарзава ва шегьредин бине дуьздаказ туькIуьрзава. Идахъ галаз сад хьиз асфальтдинни бетондин къат цIийи хъийизва, рекьин къерехар мягькемарзава, лазим тир къайдадиз гъизва.
Министерстводи хабар гузвайвал, шегьреда гьерекат авунин хатасузвилин месэладизни еке фикир гузва — бетондин блокар эцигзава, рекьерин лишанарни цIийи хъийида.
Малум тирвал, объектдал гьар юкъуз 10 машиндилай тIимил тушиз махсус техникади кIвалахзава.
3 километрдин рехъ тамамдаказ цIийи хъувунин кIвалахар, хабар гузвайвал, алай йисан ноябрдин эхирдалди кьилиз акъудда.
«Лезги газет»
