Духтур — луту
Буйнакскдай тир сарарин духтурдал (стоматолог) лутувал авунай шак фенва. РД-дин МВД-дин пресс-къуллугъди хабар гузвайвал, Буйнакск шегьердин ОМВД-див 39 йисан яшда авай, сарарин духтур яз кIвалахзавай чкадин агьалиди тапан чек къалуруналди вичин стоматологиядин кабинетдиз тадаракар маса къачун патал пулунин такьатар къачурдакай малумат агакьна.
Къейдзавайвал, ада пешедиз талукь тешкилатдихъ галаз яшайишдин икьрар кутIунна ва нетижада адан хсуси счетдиз 250 агъзур манат пул ракъурна. Икьрардин шартIаралди, шак фенвайда медицинадин техника маса къачун ва и кар тестикьарзавай чек къалурун герек тир. Амма, къачур пулунин такьатар вичин хсуси игьтияжриз харжна, ахпа ада мукьвара медицинадин тадаракар маса къачунвай вичин чирхчирдивай чек тIалабна. Гьа чек истемишзавай чкадив вахкана, сарарин духтурди лутувал авуна.
Суд-силис авун патал и делилдай материал кIватIнава.
Тиряк жагъана
Идалай вилик къарагъарай уголовный делодай тахсиркарвал субутдай затIар жагъурунин мураддалди МВД-дин уголовный розыскдин управленидин къуллугъчийри кьиле тухвай серенжемдин вахтунда Каспийскда 13,6 граммдин заланвал авай (ам 68 дозадиз барабар я) мефедрон (тиряк) дуьздал акъудна ва вахчуна.
38 йисан яшда авай, тахсиркарвал авунай шак фенвай агьали вахтуналди яшамиш хьайи Ленинан куьчедин са кIваляй полициядин къуллугъчийриз хсуси шейэрин арадай лацу порошок кIевирнавай затI акуна. Вахчур затI вуч ятIа силисчийри тайинарда.
И делилдай суд-дуван авун патал материал кIватIнава.
Жунгавар чуьнуьхна
Тарумовский райондин полициядин къуллугъчийри чкадин агьалидив чарада чуьнуьхай кьве жунгав вахкана.
Алай йисан 15-октябрдиз Тарумовский райондин полициядин отделенидив яшлу дишегьлидин кьве жунгав чуьнуьхнавайдакай хабар агакьна.
Новониколаевка хьруьн къерехда Дербент райондин 20 йисан яшда авай агьалиди гьайванар чуьнуьхунал вичин кьве таниш гада (16 ва 21 йисарин яшара авай) желбна. Шак фенвайда ихтилатайвал, дустарихъ галаз санал Новониколаевка хуьруьн патавай улакьда аваз фидайла, абуруз гьайванар акуна. “Къазанмишунин” фикир кьилиз ягъай гадади вичин дустариз кьве жунгав чуьнуьхун ва арадал атай къазанжи паюн теклифна.
Жунгаврал гуьзчивал тухузвай кас авачирди чир хьайила, жегьилри абур улакьдиз яна ва Дербент районда авай фермадиз хутахна, тукIун патал гьабуруз гун кьетIна. Амма къаст кьилиз акъудиз агакьнач — абур полициядин къуллугъчийри кьуна.
Тахсиркарвилин дережадиз килигна, са тахсиркардиз талукь яз РФ-дин УК-дин 150-статьядин 1-паюнай (акьулбалугъвилин яш тамам тахьанвайди тахсиркарвилел желб авунай) уголовный дело къарагъарнава, муькуьбуруз талукь яз — 158-статьядин 2-паюнай (угъривал).
«Лезги газет»
