Алай йисуз Дагъустанда ачух чилел гьасилзавай майваяр 41 агъзур гектарда цанва. РД-дин хуьруьн майишатдин ва недай суьрсетдин министерстводин эхиримжи делилралди, 30-сентябрдалди 28,8 агъзур гектар чилелай бегьер вахчунвай. Майвайрин бегьер кIватI хъувунин кIвалахар республикада давам жезва. Гьелелиг 968 агъзур тонн вахчунва, са гектар чилин бегьерлувал, санлай къачурла, 335 центнердиз барабар я.
Ачух чилин майваяр еке майданра гьасилунал асул гьисабдай Леваша, Дербент, Хасавюрт, Къизляр, Мегьарамдхуьруьн, Акуша, Къизилюрт районрин лежберар машгъул я. И 7 райондал Дагъустандин майвайрик квай чилерин 70 процентдилай гзаф гьалтзава. Цазвай культурайрикай рахайтIа, абурун арада 50 процентдилай гзаф чка келемри, 22 процентдилай гзаф — помидорри кьазва. Республикада гьакIни чIехи кьадарра аваз афнияр, газарар, чичIекар, серкер, недай чугъундурар ва са жерге маса культураяр гьасилзава.
Къейд ийин, майваяр гьасилунал асул гьисабдай кьилдин ксарин хсуси майишатар машгъул я. Эхиримжи йисара, государстводи “борщунин паяр” тир майвайрин кьадар артухаруниз гзаф фикир гун себеб яз, и кIвалахдал хуьруьн майишатдин тешкилатарни КФХ-яр активнидаказ машгъул жезва. Кьилди къачуртIа, эхиримжи йисан вахтунда Дагъустандин метягьдин хиле ачух чилел гьасилзавай майвайри кьунвай майданрин кьадар 36 процентдин гегьенш хьанва ва тахминан 2 агъзур гектардив агакьнава.
РикIел хкин, алатай йисуз Дагъустан Республикада тахминан 1,4 миллион тонн майваяр кIватIнай. Бегьердин чIехи пай Россиядин Федерациядин маса регионрин базарра маса гана.
«Лезги газет»
