Росстатдин делилралди, Дагъустанда калерин кьадарди 476 агъзур тешкилзава ва уьлкведин майданда им  виридалайни виниз кьадар я. Алатай йисуз  республикада 935 агъзур тонндилай гзаф нек ацанва, суьрсетдин 67 процент агьалийрин майишатрал гьалтзава. Ацазвай нек гьялунин кIвалахни чкайрал кьилиз акъудунин игьтияж фикирда кьуна, республикада нек гьялдай са жерге карханаяр арадал гъун патал серенжемар кьабулзава. “Кизляр Урицкий мясокомбинат” ООО-дин  бинедаллаз нек гьялдай цех ачухунин кIвалахар кьиле физвай гьал  и йикъара РД-дин хуьруьн майишатдин ва недай суьрсетдин  министрдин сад лагьай заместитель Шарип Шарипова ахтармишна.

Карханадин руководителди хабар гайи­вал, комбинатди  нек гьасилунин производстводин хилез артух фикир гуз башла­миш­нава. Ина 200 кьил калерин ферма ава.

“Дуьньядин виридалайни кIвенкIвечи технологияр желб авуналди,  са сменада 40 тонн нек гьялдай мумкинвал  гудай цех эцигунин кIвалахар эхирдал къвезва.  Ла­зим тир вири тадаракар чун сергьятвилер кардик кутадалди маса къачуз агакьнава. Цехдин кьетIенвал ам я хьи,  карханада  къенин юкъуз Дагъустанда авай сад тир, роботрин куьмекдалди суьрсет къапа­ра твадай линия тайинарда, къапар чеб ла­гьайтIа “тетрапакдин” жуьрединбур же­да. Идалайни гъейри, карханади лап михьи авунвай (ультрапастеризованное) нек акъудда, ида ам хуьдай вахт хейлин артухардай мумкинвал гуда”, — лагьана ада.

Шарип Шарипова къейд авурвал, алай вахтунда республикадин Кьил Сергей Меликова  ви­лик эцигнавай месэлайрин арада аваз, гьялзавай некIедин кьадар къвердавай ар­тухарун патал серенжемар кьабулзава.

Регионда  алай вахтунда гьар жуьредин гужлувал авай тахминан 60 цехди кIва­лахзава, санлай къачурла абурухъ са сменада 600 тонндив агакьна нек гьялдай мумкинвал ава. Гьа са вахтунда, икьван еке  кьадарда хаммал аватIани,  некIе­дин ва адакай гьазурнавай суьрсетдин гьа­къиндай республикадин игьтияжар асул гьисабдай маса регионрай гъизвай метягьдалди ацIурзава.

“Къенин юкъуз чна ацазвай некIедин анжах цIудан са пай  республикадин къене­ гьялзава. И жигьетдай “Кизляр Урицкий мя­­сокомбинат” ООО-дин и проект кар алай­ди я. Гужлувилел гьалтайла, республикадин проектрин арада ам кьвед лагьай­, амма алай аямдин истемишунриз жаваб гунин ва виниз тир технологийрин терефдихъай килигайтIа — кIвен­­кIве­чи чкадал ала. Чи планрик ихьтин про­ектар Дагъустандин маса паярани кьилиз акъудун ква”, — къейдна министрдин заместителди. Ада хабар гайивал, “КУМК” ООО-дин майдандал некIедин малдарвилин хиле цIийи фикирар ва технологияр кьилиз акъуддай макан арадал гъидайвал я.

Амина Муслимова