2022-йисан эхирдалди Дагъустанди хвехверин культурайрин багъларин кьадар 2 агъзур гектардив агакьдалди артухардайвал я. РД-дин хуьруьн майишатдин ва недай суьрсетдин министрдин сад лагьай заместитель Шарип Шарипова хабар гайивал, къенин йикъан делилралди, республикада хвехверин багълар кутунвай майданри 1,3 агъзур гектар кьазва.

“И хел а кардалди итижлу я хьи, и багъларин бегьердихъ, яни кIерецрихъ ва шуьмягърихъ   муьштерийрин патай гьамиша игьтияж ава, абур яргъал вахтуналди  хуьн патал еке харжияр герек жезвач, тарарихъ гелкъуьнин карни гзаф зегьмет алайди туш”, — гьисабзава Ш.Шарипова.

Ада хабар гайивал, республикадин багъларин санлай къачур кьадар йисан сифте кьиляй 28,8 агъзур гектардиз ба­р­абар­ тир ва абурукай 21,9 агъзур гектар­дин багъ­лар бегьердал атанвайбурук акат­зава.

“2022-йисан эхирдалди 1,45 агъзур гектардин майданра  цIийи, гьа гьисабдай яз 400 гектарда фад арадал къведай ва ви­низ тир бегьерлувилин жуьредин багълар кутун фикирда кьунва. Къенин йи­къал­­­ди  къелемар цанвай майданри 860,2 гектар тешкилзава, гьа жергедай яз фад арадал къведай ва виниз тир бегьерлувилинбуру — 326 гектар ва кIерецринни шуьмягърин  къелемри — 528 гектар”, — хабар гана  Ш.Шарипова.

Лагьана кIанда,  республикада  гзаф йисара экъечIдай набататрин тарар цIийи хъувунин, куьгьне хьанвай, гьакIни нетижасуз, тIимил бегьерлувал авай багълар  цIийибуралди эвезунин серенжемар кьабулзава. ГьакIни хуьруьн майишатдин суьрсет гьасилзавай ксар фад арадал къведай ва виниз тир бегьерлувилин жуьредин багълар кутунал гьевесламишзава. Дуьздаказ гелкъуьн тешкилайла, ихьтин багълари цайидалай кьулухъ пуд лагьай йисалай виниз тир бегьерар гъиз башламишзава. И кIвалахдин нетижа яз  эхиримжи кьве йисан вахтунда  республикада цIийи жуьредин багълар  386,6 гектарда цанва.

Ш.Шарипован гафаралди, алай йисан емишрин бегьер  220 агъзур тонндиз (са гектардай 100 центнер) барабар хьун гуьз­лемишзава — им алатай йисан кьадардилай  20 агъзур тонндин виниз тир делил я.

Чи мухбир