Дагъустандин здравоохраненидин министерстводин пресс-къуллугъди хабар гузвайвал, и йикъара республикадин шегьерринни районрин медицинадин идарайриз санитариядин 28 машин чара авунва.
Къейд ийин хьи, цIийи машинар “Модернизация первичного звена здравоохранения” программадин сергьятра аваз маса къачунва. Медицинадин идарайрин кьилин духтуррив ва улакьар гьалзавайбурув куьлегар вахкуниз талукьарнавай мярекатда РД-дин Гьукуматдин Председателдин заместитель Мурад Къазиева, здравоохраненидин министр Татьяна Беляевади ва масабуру иштиракна.
“Алай йисуз министерстводи маса къачунвай санитариядин машинрин кьадар 91-дав агакьнава. Алатай йисуз абурун кьадарди 117 тешкилна. Духтурханайра цIийи улакьар пайда хьуни республикадин медицинадин идарайрин кIвалах вилик финиз, менфятлуди хьуниз таъсирзава”, — лагьана Т.Беляевади.
Лагьана кIанда, винидихъ тIвар кьур программадин сергьятра аваз 91 машин маса къачуниз 81 миллион манат пул харжнава.
«Лезги газет»
