Дербентдин  кьил Рустамбег Пирмегьамедован иштираквал аваз мукьвара шегьерда Абили Центр ачухаруниз талукьарнавай мярекат кьиле фена. Абили Центр — им еримлу хьун (развитие) пай­гар­дик квачир аялриз куьмек гузвай реабилита­циядин центр я. Ина аялриз нетижалу комплексный куьмек гун патал духтурри, муаллимри, логопедри ва психологри санал  кlва­лахда.

Им шегьер патал важиблу ва­къиа тирди къейд авунихъ галаз сад хьиз, Р.Пирмегьамедова центр ачухуник кьил кутур тешкилатчийриз сагърай ла­гьана.

— Центр пайда хьуникди начагъ аялар авай ди­де-бубайриз регьят жеда, — лагьана ада. — Ги­ла абуруз ­Ма­хач­къаладиз фин герек амукьдач ва и карди абуруз чпин вахт кьенятдай, алава харжияр тийидай мумкинвал гуда. Гила аял­риз лазим тир терапиядин ва реабилитациядин вири кlвалахар чкадал тамамарда. Заз ина аялрин къуллугъда акъвазна кlва­ла­­хиз гатlун­завай духтурризни пешекарриз сагърай лугьуз кlанзава. Квехъ и регьят ту­шир­ кlвалахда анжах агалкьунар хьурай!

Мярекатдин сергьятра аваз мугьманрин арада ло­тереядин къайдада сертификатар къугъвана. Эхирдай аялриз машгъулардай программани тешкилнавай.

Къагьриман Ибрагьимов