5-8-октябрдиз Подмосковьеда  Вирироссиядин агропромышленный “Къизилдин зул” выставка 24 лагьай сеферда кьиле фена. РД-дин хуьруьн майишатдин ва недай суьрсетдин министерстводи хабар гузвайвал,  Дагъустан Республикади выс­тавкадин Гран-при (кьилин пишкеш)  къазанмишна.

“Къизилдин зул”, адет яз, хуьруьн ма­­йи­шатдин ва недай суьрсетдин промышленностдин йикъан вилик (и йисуз ам 9-октябрдиз къейдна) тешкилзавайди я. Уьлкведин агропромышленный кьилин выставкада Дагъустандин патай иштиракай делега­циядик РД-дин Гьукуматдин Председателдин заместитель Нариман Абдулмуталибов, РД-дин хуьруьн майишатдин ва недай­ суьрсетдин министр Мухтарбий Аджеков, РД-дин Минмелиоводхоздин директор Залкип Къурбанов, республикадин са жерге комитетрин председателар, векилар квай.

Дагъустанвийри выставкадиз  ми­жеяр, якIун ва некIедин суьрсет, вирт, ширин­лухар, емишар, майваяр гъанвай. Чпин ме­­тягь “Ириб”, “Гоцатлинский консервный за­вод”, “Кизляр Урицкий мя­сокомбинат”,  “Кур­бансервис”, “Кизляр­агрокомплекс”, “Батыр Бройлер”, “Высокие молочные тех­нологии”, “Анжелина”, “Нагорный Дагестан”, “Сила Кавказа”, “Шалбуз”, “Аквариус”, “Рычал-Су”, “Денеб”, “Мевер”, “Сад” КФХ-ди, гьакIни Да­гъустандин госу­дарстводин аграрный университетди, суьр­сет гьялунал машгъул са жерге маса карханайри майдандиз акъудна.

Выставкадин кIвалахда активнидаказ иштиракунай Дагъустан Республика, винидихъ лагьанвайвал, Гран-придиз ла­йихлу хьана. Идалайни гъейри, региондин хуь­руьн майишатдин суьрсет гьасил­за­вайбуру санлай къачурла 23 медаль  (къизилдин  — 16,  гимишдин  — 3  ва  буь­руьнж­дин  —  4) къазанмишна.

Къецепатан уьлквейрай гъизвай ниси ватанда гьасилзавайдалди эвезунин технология туькIуьрунай ДагГАУ виниз тир дережадин пишкешдиз лайихлу хьана.  Къизилдин мад 6 медаль университетдин ниси хкуддай “Мишель” карханадиз гана. Къизилдин медалар гьакI Дербентдин че­хирар хкуддай  компанийрини хкана.

Амина Муслимова