И йикъара Дагъустан Республикадин Гьукуматдин Председателдин заместитель Рамазан Жафарова наркотикриз акси комиссиядин нубатдин заседание кьиле тухвана. Идакай чаз Дагъустандин Гьукуматдин пресс-къуллугъди хабар гана.
Заседание ачухдайла, вице-премьерди алай вахтунда оперативный, гьа гьисабдай яз, жемиятдинни сиясатдин ва яшайишдинни экономикадин гьаларни, гьелелиг четинбур яз амукьзавайди къейдна.
— Гьа са вахтунда муниципалитетра оперативный гьалар къайдадик хьун еке къуватар серф авун, тахсиркарвилерин вилик пад кьунин карда тешкиллувал, кIвалахдин менфятлувал хкажун истемишзава, — къейдна ада. — Дагъустандин жегьилрин арада сагълам уьмуьр кечирмишунин жигьетдай таблигъат тухунихъ еке метлеб ава. Наркоманиядин вилик пад кьунин серенжемрин сергьятра аваз къенин юкъуз кьилин фикир акьалтзавай несилар куьчедин чIуру таъсирдикай хкуддай рекьерикай сад тир санлай гзаф инсанар машгъул жедай спортдин майданар ачухуниз гузва.
Рамазан Жафарова республикадин муниципалитетра жегьилрин крарин рекьяй органрин кIвалах активламишун патал серенжемар кьабулун лазим тирди къейдна. Идахъ галаз алакъалу яз, ада тренерриз ва акьалтзавай несилдиз тербия гунал машгъул жезвай ксариз планрик наркотикриз акси темадай суьгьбетар кутунин, гьакIни агьалияр спортдал жезмай кьван гзаф желб авунин тапшуругъарни гана.
Комиссиядин заседанидин членри Дагъустанда яшар тамам тахьанвайбурун ва жегьилрин арада наркотикар квай затIар чукIурунин, ишлемишунин ва маса гунин вилик пад кьуниз талукь месэлаяр, гьакI муниципалитетра наркотикриз акси комиссийрин кIвалахдин менфятлувал веревирдна.
И месэладай РД-дин жегьилрин крарин рекьяй министр Камил Саидова гегьенш доклад авуна. Ада къейд авурвал, Дагъустанда жегьилрин арада наркоманиядин, сагъламвилиз пис таъсирдай затIар маса гунин вилик пад кьун патал гуьгьуьллубурун гьерекатар активнидаказ вилик физва. Алишверишдин чкайра, авай малуматралди, наркотикар маса гун дуьздал акъудай дуьшуьшарни хьанва. И завалдиз талукь яз жемиятдин гегьенш къатарин арада гъавурдик кутунин серенжемар кьиле тухузва.
— Къенин юкъуз гуьгьуьллубурун дестейрин сиягь кардик кутазва. Ахьтинбур республикадин 16 райондани 8 шегьерда ава. Санлай къачурла, гуьгьуьллубурун кьадар 100 агъзурдалай виниз алатнава, — хабар гана министрди.
Мадни малум хьайивал, Дагъустандин жегьилри Вирироссиядин, региондин грантар патал конкурсра иштиракзава. ИкI, 2021-йисуз гъалибчийриз чпин проектар кьилиз акъудун патал 7 миллион манатдилай артух пул гана. Дагъустандин Кьил С.Меликова вичин Указдалди Республикадин Кьилин грантрин сиягьдик 2022-йис патал жегьилрин сиясатдин хиляй наркотикриз акси проектрин тереф хуьн яз 300 агъзур манатдин кьадарда аваз кьве грант кутунва.
Дагъустандин образованидин ва илимдин министр Яхья Бучаева алай йисуз республикада сагълам уьмуьр кечирмишуниз ва наркотикриз акси яз 3 агъзурдалай виниз серенжемар кьиле тухвайди, абура 400 агъзурдалай виниз школьникрини студентри иштиракайди къейдна. Ада мадни хабар гайивал, Москвадин психоанализдин институтдин бинедаллаз “Трезвая Россия” федеральный проектди арадал гъанвай методикадин кIвалахрикай менфят къачуналди, мектебра “Уроки трезвости” лишандик кваз наркотикриз акси яз классдин сятер кьиле тухвана.
Эхирдай мярекатдин иштиракчийри Дагъустанда наркотикриз акси комиссиядин заседанидин протоколдин проект рейсадвилелди кьабулна.
Рагнеда Рамалданова
