Жаваб агакьна
Крымдин муькъвел теракт тешкилайдалай кьулухъ 2 югъ алатайла, Россияди Украинадин инфраструктурадин объектриз ягъунар кьуна.
10-октябрдиз РФ-дин оборонадин министерстводи малумарайвал, яргъал мензилдин макьсаддив дуьм-дуьз агакьардай вини дережадин яракьрин куьмекдалди Украинадин военный, алакъадин ва энергетикадин объектар яна. Кьилди къачуртIа, Киевда, Одессада, Львовда, Днепропетровскда, Ивано-Франковскда, Тернополда, Харьковда, Киевдин, Житомирдин, Полтавадин областра ва масанра хъиткьинунар арадал атана.
И юкъуз ПВО-дин куьмекдалди пилот галачиз лув гудай ругуд аппаратни тергна.
Сабур акьалтIнава
Госдумадин Председатель В.Володина вичин телеграм-каналда къейднавайвал, мукьвал-мукьвал Запорожьедин ва Курскдин атомдин электростанцийрин кар алай чкаяр ягъуналди, Украинадинни Россиядин мулкара жемиятдин деятелар тергуналди, Крымдин муьгъ хъиткьинаруналди, Киевдин режим террориствилинди хьанва.
“Зеленскийдин гьерекатри асул гьисабдай адан миллетбазвилин сиясатдин залуквиле авай Украинадин халкь азабрал гъана”, — кхьенва В.Володина вичин “Сабурдин къаб кьадардилай артух ацIанва” кьил ганвай къейдера.
Терактар кьиле тухунин буйругъар гузвай Украинадин президент ада дуьньядин террористрин жергеда тунва. Зеленскийдин режимдин тереф хуьзвай РагъакIидай патан сиясатчийри терроризмдиз къаюмвалзава.
Магълубвал яз гьисабзава
НАТО-дин генсек Й.Столтенбергра малумарнавайвал, Россиядихъ галаз авай къалмакъалра Украина магълуб хьайитIа, им неинки Украина, гьакI НАТО патални магълубвал жеда. “Чун патал Украина гъалиб хьун важиблу я”, — лагьана ада. Идакай “Новости” РИА-ди хабар гузва.
Столтенберга гьеле 2014-йисалай Украинадин тереф хуьзвайдакай, Россияди СВО кьиле тухунив эгечIайдалай кьулухъ военный жигьетдай Украинадиз гузвай куьмек гзаф кьадарда артухарайдакай ихтилатна.
РФ-дин Хатасузвилин Советдин председателдин заместитель Д.Медведева къейд авурвал, Столтенберга НАТО-ди Россиядихъ галаз женг чIугвазвайди ачухдаказ хиве кьуна.
Мад секинзавач
Эрменистандин оборонадин министерстводи малумарнавайвал, 10-октябрдин йифен вахтунда Азербайжандин яракьлу къуватри часпардин патав гвай Эрменистандин терефар жуьреба-жуьре яракьрай яна. Оборонадин министерстводин векил А.Торосянан гафар “Новости” РИА-ди раижна.
Къейдзавайвал, яракьралди жаваб хгунин нетижада цIай гунин гьерекатар акъвазна. Эрменистандин патай хасаратвилер хьайибур авач. Эрменистандинни Азербайжандин арада авай часпардал гуьлле гунин женгер мукьвал-мукьвал кьиле физва. Идалай вилик 13-сентябрдизни сада-садаз цIай ганай. А чIавуз кьве терефдини аскерар телеф хьайидакай малумарнай.
Чинебан мергьяматлувал
“Новости” РИА-ди хабар гузвайвал, малум тушир мусурманди Набережные Челны шегьерда эцигзавай мискIиндин счётдиз 30 миллион манат пул янава.
Чкадин имамди къейд авурвал, им икьван чIавалди тахьай хьтин вакъиа я. Вич малумар тавур мергьяматлу мусурманди ракъурай такьатрихъ мискIиндин пуд къуба туькIуьрдайвал я.
ТIимил хьанва
Уьлкведин Роспотребнадзордин пресс-къуллугъди малумарнавайвал, Россияда ковиддик начагъ жезвайбурун кьадар эхиримжи пуд гьафтеда агъуз аватнава.
Къейдзавайвал, алатай гьафтедин делилрив гекъигайла, начагъ жезвайбурун кьадар 39,3 процентдин тIимил хьанва.
Сбербанкди тагькимарзава
“Новости” РИА-ди раижнавайвал, Сбербанкди тапан кагъазрихъ галаз алакъалу телефонрин цIийи жуьредин лутувиликай агьалийриз виликамаз хабар ганва.
ЧIуру ниятар авайбуру жуьреба-жуьре онлайн-сервисрин тIварарихъай аккаунт агалунин къурхуяр гузвай чарар ракъурзава: “Шаклу гьерекатар себеб яз, куь аккаунт агалда. Куьмек гудай къуллугъдиз зенг ая”. Ихьтин малумат-къурху ракъуруналди, лутуйри агьалияр телефондай рахуниз мажбурзава. Чарче къалурнавай нумрадиз зенгайла, “чIулав сиягьда” гьат тавун патал лутуйри агьалийривай банкунин картадин делилар хабар кьазва ва пул ракъурун тIалабзава. ЧIалахъардай жуьреда ихтилатайтIани, банкунин пешекарри лутуйрин гафар гьисаба кьун тавун герек тирди тагькимарзава. Ихьтин дуьшуьшра агьалийривай Сбербанкдин официальный сайтда къалурнавай нумрадиз зенг ийиз жеда. Амма чара ксариз картадин делилар садрани раиж тавун теклифзава.
«Лезги газет»
