Алай вахтунда республикадин и ва я маса чкайра, шегьеррани районра уьлкведин Президентди кьунвай рекьел разивал малумарун яз, гьар жуьредин мярекатар кьиле физва. Чи уьлкве патал гьам сиясатдин, гьамни экономикадин рекьяй четин и девирда агьалияр кьиле физвай крарин гъавурда дуьздаказ гьатун, халкьдин арада къалабулухдин гьиссер тIимил хьун иллаки важиблу я.
Гьаниз килигна, кьиле физвай гьерекатрик, гъиле кьунвай кардик хъсан патахъай жуван пай кутун, жедай куьмек гун яз, и йикъара Каспийск шегьердин «КаспийТеплоСервис» ООО-дин коллективда махсус собрание кьиле фена. Асул гьисабдай ам Россияди Украинада кьиле тухузвай военный махсус серенжемдихъ ва уьлкведа малумарнавай тамам тушир мобилизациядин гьерекатдихъ галаз алакъалу яз арадал атанвай къалабулухдин, яни татугай гьиссер арадай акъудун, зегьметчи коллективда руьгь хкажун патал тешкилнавайди тир.
Карханадин гьаятда кьиле фейи собранидал «КаспийТеплоСервис» ООО-дин генеральный директор Тагьир Агьмедова, участокдин начальник Руслан Шихкеримова ва профкомдин председатель, технохаталувилин рекьяй инженер ва Каспийск шегьердин агъсакъалрин Советдин председатель Гьанифа Жабраилова карханадин коллектив четинди тир и вахтунда инсанри, ватанэгьлийри чеб гьикI тухун лазим ятIа, гьадан гъавурда туна.
“Гьуьрметлу юлдашар, душманди ва адан терефдарри гьикьван чалишмишвилер авуртIани, абурулай са шейни алакьдач, вучиз лагьайтIа, чун гужлу я ва чи кар гьахълуди я. Уьлкведин Президентдин буйругъдалди, исятда чи уьлкведа тамам тушир мобилизациядин гьерекат кьиле физва. И кар мажбуриди я, гьикI лагьайтIа, чна чи сергьятар хуьн чарасуз я. Зун инанмиш я, чун гьикI хьайитIани гъалиб жеда”, — лагьана юлдашрихъ элкъвена Гьанифа Жабраилова. Анал рахай маса юлдашрини гьалар хъсан патахъ дегиш ва гьахълу кар анжах гъалибвилелди акьалтIда лагьана умудлувал къалурна.
“Исятда уьлкведа, гьа жергедай яз чи республикадани арадал атанвай гьалар четинбур я, гзаф ксарик къурхулувал, къалабулух ква, абур и ва я маса крарин гъавурда дуьздаказ гьатзавач. Гьаниз килигна, чна жуван коллективда гъавурда твадай кIвалах тухун кьетIна — икI хьайила абур чебни секин жеда, арадал атанвай гьалдиз дуьздаказ килигда, чпин патарив гвай ксарни, мукьва-кьилиярни гъавурда твада”, — къейдна Гь.Жабраилова чахъ галаз хьайи суьгьбетда.
Къейд ийин, гьакъисагъ зегьметчийрикай ва тежрибалу пешекаррикай ибарат «КаспийТеплоСервис» ООО-дин сих коллективди лайихлу крарик мукьвал-мукьвал чпин пай кутазва. ИкI, вирида рейсадвилелди кьабулай къарардалди, са шумуд варз идалай вилик карханадин коллективди са йикъан мажиб Луганскдин ва Донецкдин халкьдин республикайрай катнавайбуруз куьмек гун патал чара авунай.
Жасмина Саидова
