2022-йисан 8-октябрь. Россиядин Игит Энвер Набиев хайи хуьруьз — гъвечIи Ватандиз хтай югъ чепивийрин рикIел гьамишалугъ яз аламукьда. Ам къаршиламишиз Ахцегь рай­ондин Чеперин хуьруьн патав гвай “Сирар” майдан жемятдив ацIанва. Абурун арада хуьруьн ва райондин руководстводин, жемиятдин тешкилатрин, СМИ-дин векилар, хуьрерин кьилер, патарилай хтанвай мугьманар аквазва. Сада-садаз лезги хциз РФ-дин Президент Владимир Путинан Указдалди, Игитдин тIвар гун, ам дяведин къизгъин цIаярай акъатна, сагъ-саламатдиз хайи хуьруьз хтун мубаракзава…

Агъадихъай милли парталар алай зиринг атлуяр вилик кваз машинрин цIиргъ хкаж хьана. Зуьрне-далдамдин ван акъатна. Машинрай жегьилрихъ галаз женгинин гвардиядин викIегь майор эвичIзава. «Ассаламу алейкум, стхаяр» лагьана, ада са-садан гъил кьазва. Игит хва нисини фу, ширинлухар авай сини гвай школьникри къаршиламишзава. Гуьруьшдин иштиракчийрикай сада Игитдин кIвачерив гьер тукIвазва. Гуьгъуьнлай япара РФ-дин Гимндин ван аваз Ахцегь райондин депутатрин Собранидин председатель Абдулкерим Палчаевахъ галаз Энвер Набиева хуьруьн обелискдал цуьквер эцигна, 1941-1945-йисара Ватандин ЧIехи дяведа иштиракай чепивияр рикIел хуьн яз, жемят са декьикьада кисна акъвазна.

Игит къаршиламишунин кьилин серенжем хуьруьн клубда давам хьана. Зал сиве-сивди инсанрив ацIанвай, абуру кIвачел акъвазна гурлу капаралди чпин кьегьал хва тебрикна. Устад тамада, хуьруьн мектебдин муаллим Ярагьмед Гуьлагьмедова, тарихдин мана-метлебдин мярекат ачухунин гаф рахуналди, трибунадихъ Абдулкерим Палчаеваз теклифзава.

— Ахцегь район яшайишдин вири хилерай бажарагълу, викIегь рухвайралдини рушаралди тафаватлу я. Районда икьван чIа­валди Ватандин ЧIехи дяведин кьве ва зегьметдин са Игит авай. Гила абурал са тIвар алава хъхьанва: чIехи бубайрин кьегьалвилер давамарзавай Энвер Альбертович Набиеваз Россиядин Президентдин Указдалди, Игитдин тIвар гун чна тебрикзава. Ам чи рай­ондин, вири лезги халкьдин кьилин винизвал, дамах я. Кьиле США аваз НАТО-дин ви­ри уьлквеяр чаз акси хьанвай, уьлкведа та­мам тушир мобилизация малумарнавай четин шартIара халис итимар Ватан хуьз къарагънавайла чи хва хурудал къизилдин гъед алаз хтун иллаки важиблу ва лишанлу я. Ада вичин чешнедалди жегьилрик, армиядиз физвайбурук руьгь кутазва. И йикъара чна Эн­вер Альбертович Ахцегьа райондин дережада аваз лайихлудаказ къаршиламишда, — лагьана А.Палчаева. Ада гьакIни Энвер Набиеваз Ахцегь райондин кьил Осман Абдулкеримован, вири районэгьлийрин патай Россиядин Игитдин тIвар гун мубаракна, женгинин ва ислягь уьмуьрда адахъ мадни еке агалкьунар хьун алхишна.

— Набиеврин тухумдай тIвар-ван авай бажарагълу ксар — алимар, муаллимар, инженерар, пагьливанар, карчияр пара акъатна, гьатта генерал Рамзес Набиевни (1969-2019) хьана, — лагьана гуьгъуьнлай трибунадихъ экъечIай Чеперин хуьруьн администрациядин кьил Багъир Забитова. — Гьавиляй Энвер стха Россиядин Игит яз хтана, гуя хайи халкьдин вилик гьахъ-гьисаб ийиз акъвазун дуьшуьшдин кар туш. Ам акваз чи рикI шадвилинни ватанпересвилин гьиссерив ацIузва. Алай вахтунда гъиле яракь аваз армиядиз физвайбур вири игитар, Энвер чаз чешне я. Душмандихъ галаз къати женгина ам, гьелбетда, игит жедай фикир аваз ваъ, рикIе Ватан хуьнин, женгинин юлдашар къутармишунин къаст аваз асландиз элкъвенвай…, — таъ­сирлу рахунрилай кьулухъ ада Игитдиз лайихлу пишкеш яз гапур ва хуьре кIвал эцигун патал чилин участок гана. Ада гьакIни мярекат тешкилуник чIехи пай кутур жумарт карчи Сагьраб Шириноваз ва кIватI хьанвай вири хуьруьнвийризни мугьманриз сагърай лагьана.

Чеперин хуьруьн школадин директор Зумруд Забитовади Набиеврин баркаллу тухумдикай ихтилат авуналди школадин коллективдин патай Энвер Набиеваз, Игит хва тербияла­мишай буба Альбертаз, диде Сунадиз ва мукьва-кьилийриз игитвилин тIвар мубаракна.

— Зи хва, чун — вири мугьманар икI хъсандиз къаршиламишунай куьн пара кьадар сагърай. Энверакай РФ-дин Игит хьун са диде-бубадин ваъ, гьелбетда, адаз тарс, тербия гайи муаллимрин, парабурун, вири Дагъустандин лайихлувал я. Чаз игитар мадни жедайдахъ ва абур гъалибвал гваз сагъ-саламатдиз чпин хизанриз хкведайдахъ зун инанмиш я, — лагьа­на Энверан буба Альберт Набиева.

Мярекатдин сергьятра аваз мадни Сагьраб Ширинов, Чеперин хуьруьн тарихда чешнелу гел тунвай Разимегьамед Нурагьмедов, зегьметдин ветеранар тир Энвер Къурбанов, Мирвет Насрулаев, шаир Севинжи Муртазалиева, районда дишегьлийрин Советдин председатель, манидар Таира Мегьарамова ва масабур рахана.

Мярекатдин эхирдай сегьнедиз РФ-дин Игит Энвер Набиев экъечIна:

“Гьуьрметлу хуьруьнвияр, мугьманар!  Заз ихьтин гьуьрмет авунай куьн пара кьадар­ сагърай! Намус, Ватан хуьнин буржи, жуьрэт­лувал, викIегьвал, кьегьалвал чун па­тал цIийи­ ивирар туш, абур чал чIехи бубайрилай­ агакьнава. Школадани, хизандани чун хайи чилихъ рикI кузвай халис ватанпересар хьиз тербияламишна. Бубади гъвечIи чIава­лай чаз, аялриз, дяведин четин йисара чепивийри­ фронтда ва адан далу пата — дагълух хуьре авур кье­­­гьалвилерикай суьгьбетдай. Гуь­гъуьн­лай Россиядин “Восток” дестедик кваз, Украинадин дяведа авайла, абурун кьегьалвилер заз чешне хьана. Гьар са ватанперес хьиз, зунни Ватандин вилик жуван хивевай везифайрив намуслувилелди эгечIна… Чун ис­­лягь зегьметдани, женгинани, гьар са карда­ викIегь, вилик хьана кIанда. Къуй дуьнья ислягь хьурай! Виридан кIва­ле­риз къведайбур анжах шад хабарар хьурай!” — лагьана Э.Набиева.

Мярекатдин кьвед лагьай пай хуьруьн мис­кIинда диндин межлисдин къайдада давам хьана.

Дашдемир Шерифалиев