Мукьвара Ахцегьа Украинада кьиле физвай махсус серенжемдай хтанвай стхаяр тир Замедин ва Велимет Абдуллаевар къаршиламишна. Абурун пуд лагьай стха Шихмурадани Донбасс хуьнин женгера иштиракзава. Райондин “Боевое братство” тешкилатдин кьил Руслан Сулейманова тешкилай гуьруьшда — зегьметдин ва дяведин ветеранри — Мамед Агьмедова, Мегьамед Ибрагьимова, Эмиржан ТIалибова, Эльбрус Гьарунова ва гзаф масабуру иштиракна.
Руслан Сулейманова Ватан хуьнин буржи намуслувилелди кьиле тухузвай ахцегьви викIегь стхайриз вири районэгьлийрин патай сагърай лагьана. “Неинки дяведа гъиле яракь аваз, гьакI хайи маканда куьне жегьилрин арада кьиле тухузвай гъавурдик кутунин, ватанпересвилин кIвалахни душмандихъ галаз чIугвазвай женгиниз барабарди, важиблуди я”, — къейдна ада.
Хуьруьгрин хуьруьн школадин директор, тарихдин илимрин кандидат Мамед Агьмедова кIватI хьанвайбуруз ДНР-динни ЛНР-дин регьберри чпин регионар Украинадин нацистрикай хуьн патал РФ-дин Президент Владимир Путинавай куьмек тIалабунин себебрикай суьгьбетна. Эхирдай митингдин иштиракчийри, Ватандин ЧIехи дяведа телеф хьайи районэгьлияр рикIел хкунин лишан яз, обелискдал цуьквер эцигна.
Дашдемир Шерифалиев
