Дагъустандин Кьил Сергей Меликова ислен юкъуз Махачкъалада кьиле фейи совещанидал республикадин Гьукуматдал тамам тушир мобилизациядин сергьятра аваз дяведин рекьяй къуллугъ авуниз эвер ганвайбурун хизанриз куьмекар гунин жигьетдай серенжемар кьабулун тапшурмишна.
РД-дин Кьили хабар гайивал, ихьтин хизанриз сифте нубатда 100 агъзур манатдин кьадарда аваз пулдин куьмек гуда. Сергей Меликова шегьерринни районрин кьилериз чкайрал хизанриз пулдин куьмек гунин месэла хсуси гуьзчивилик кутуниз эвер гана. “За виликдайни лагьанай: чи гадайри гъиле яракь аваз хайи уьлкве хуьзвай чIавуз, абурун хизанар куьмек авачиз амукьдач…”, — къейдна С.Меликова.
Лагьана кIанда, винидихъ тIвар кьур хизанар патал са жерге кьезилвилерни кардик акатдайвал я. Мисал яз, дяведин рекьяй къуллугъзавай дагъустанвийрин аялар патал республикадин вузра махсус квота арадал гъида, мектебда кIелзавайбур жуьреба-жуьре кружокриз, секцийриз пулсуздаказ фида, ихьтин хизанра авай яшлубуруз, набутриз яшайишдин рекьяй къуллугъ авунин кьетIен жуьре тешкилда, бейкарар кIвалахдалди таъминарда. И ва са жерге маса месэлаяр мукьвара къуватда гьатдайвал я.
Чи мухбир
