2023-йисуз дидевилин капитал индексация хъувун фикирдиз къачунва. Къейдзавайвал, такьатрин кьадар 12,4 процентдин артух хъжеда — сад лагьай аялдинди 589,6 агъзур манатдал кьван, кьвед лагьай аялдинди — 779 агъзур манатдал кьван.
Садра гузвай такьатар
2023-йисан 1-февралдилай аял хьайила са сеферда яз гузвай пулунин такьатрин кьадар 12 процентдин (23011 манатдал кьван) артух жеда.
КIвалахзавай диде-бубайриз и такьатар арза галачиз тайинарзава. 2022-йисан эхирдалди кIвалахдик квачир диде-бубайривай и такьатар РФ-дин Пенсийрин фондуна туькIуьриз жеда, 2023-йисалай лагьайтIа, — Россиядин социальный фондуна. Къейд ийин, и такьатар къачунин къайгъу аял хьайи йикъалай башламишна адан 6 варз тамам жедалди чIугуна кIанда.
РД-дин МФЦ-дин кьилин идаради раижнавайвал, йисни зура аялдихъ гелкъуьнай гузвай такьатрин кьадарни кIвалахдик квай диде-бубаяр патал артух жеда. И такьатрин агъа кIанин кьадар 7677 манатдалай 8629 манатдал кьван ва вини кьилин кьадар 31282-далай 33281 манатдал кьван хкаж жеда.
Къейд ийин, и пособидин кьадар работникдин алатай 2 йисан юкьван къазанжидин 40 процентдикай ибарат жеда.
Страховой пенсия
Россиядин Зегьметдин ва яшайишдин рекьяй хуьнин министерстводи хабар ганвайвал, къведай йисан 1-январдилай кIвалахдик квачир пенсионеррин страховой пенсиядин кьадар 4,8 процентдин хкаж хъжеда.
Кредит вахкудач
Тамам тушир мобилизациядин сергьятра аваз военный къуллугъдал эвер ганвай ксари къуллугъ тамамарзавай муддатда кредитдин гьакъи гудач. “Кредитрин тIатIилар” Госдумади тестикьарнава.
Къейдзавайвал, военный къуллугъ тамамарзавай ксаривай, эгер кредит къачунватIа,чеб адакай вахтуналди азад авун патал кредиторривай тIалабиз жеда.
«Лезги газет»
