ЛГА ЭНВЕРАН — 70 йис

Миже хьиз, хъваз ширинвал зи Ватандин,

Къекъвена зун, тIвар вине кьаз инсандин,

Пайда за рикI, гьайиф текъвез зи чандин,

Герек чIавуз къадир жедай дустариз.

* * *

Сад алахънава дуьзвал кьаз вине,

Сада чIурзава дуьньядин бине.

Лга Энвер

Ахцегь райондин ктабханадин кIел­дайбурун залда ахцегьви шаир Лга Энверан 70 йис тамам хьуниз  ва адан шаирвилин яратмишунриз талукьарнавай межлис кьиле фена.

Вуж я ам — Лга Энвер? Вичи лугьузвайвал, райондин “ЦIийи дуьнья” газетдин ашкъилу корреспондент, амайбурулай  гьич тафаватлу тушир инсан я. КIелдайбуру, хуьруьн ва райондин жемятри адан тIвар гьуьрметдалди кьазва. Вучиз ла­гьай­тIа, и адетдин зегьметчи Ватанда, халкьарин арада къайда-адалат артухарунал  вичин “руьгьдин ранда” хцидаказ хуьз хайи лезги чIал мадни машгьурунал машгъул  кас я.

Гьарда вичин стул чими ийиз, фу хъуь­туьларзавай девирда яратмишунрин ре­кье­­вай инсандиз гьуьрмет авун, ам рикIе­лай алуд тавун неинки гьахьтин инсанар чеб, гьакI чи уьмуьрдин итижлувал патални лишанлу кар я.

Чахъ галаз суьгьбетдайла,  Лга Энвера икI лагьана:

— Са бязи юлдашри (тIварар за кьадач) къуй зи паталай секинсузвал тавурай. Заз ктабар акъудунихъ, тIвар машгьур авунихъ калтугдай къастар авач. За жуван рикIин гьиссер-фикирар шииррин цIарара тваз, инсанриз раижзава. Абуру заз къимет гайитIа, гуда, тагайтIани, инжиклувал авач. Заз тарсар гайи, лезги чIалан сирер-кьетIенвилер ачухарай рагьметлу муаллимар — Рамазан ва Гьуьсейн Гашароврин, Нияз Мирзоеван, урус  чIаланни литературадин тарсар гайи Ольга Петровна Агьмедовадин экуь къаматар зи рикIелай садрани алатдач. Белки, зи тIварни сад-вад касди гьуьрметдивди рикIел хкида.

Гаф кватай  чкадал заз  литературадин рекье куьмекар гуз, къуьн кутур, зи аш­къидиз къилав гайи, хейлин йисара “ЦIийи дуьнья” газетдин редактор хьайи Россиядин журналистрин Союздин член, Дагъус­тандин культурадин лайихлу работник Нариман Мамедовичаз, зи юбилейдиз талукь мярекатдал хуш келимаяр ла­гьай ва зи ши­ирар таъсирдай къайдада кIелай ДАССР-дин культурадин лайихлу работник Гьамдуллагь Бабаеваз, муаллим Манатилов Гьазрединаз,  мярекат бажарагълувилелди кьиле тухвай Гуьлжагьан Гъаниевадиз ва гьакIни Кьурукаларин хуьруьн библиотекадин заведующий Мая Нурмегьамедовадиз сагърай лугьуз кIанзава.

Максим  Алимов