Чан зи лезги чIал!
Ал рангунин къизмиш тир тав,
Багьа нямет, хуьдай гьар чIав,
Ядигар яз агакьай чав,
Чан Эминан чIал!
Яваш тежер бейгьушривай,
Къалп мецерин кушкушривай,
Шив хьиз, даим сархушдавай,
Чан зи лезги чIал!
Сурани зун жедач секин,
Кутаз хьайтIа сада вак кин.
Вафалу яз, кьада за кьин:
Хуьда лезги чIал!
Пудкъанни цIуд.
Къаршидиз къвез, юзуриз гъуд,
Зи жегьилвал ийиз къакъуд,
Лагь ви фикир дуьздал акъуд,
Пудкъанни цIуд, пудкъанни цIуд.
Къвез — фида мад йисар шумуд,
Чир хьухь, зайиф жедач умуд,
Гьавая зи ийимир суд,
Пудкъанни цIуд, пудкъанни цIуд.
ЧIулав чIарар ийиз рехи,
ЦIалцIам чинал — бириш терхи,
“Кьуьзуьд” лагьай гаф гьикI эхин,
Пудкъанни цIуд, пудкъанни цIуд.
Вуч фад на зун гузва маса,
Вахтсуз гъиле вугуз аса?
Гагь — пагьливан, гагьни — кваса,
Пудкъанни цIуд, пудкъанни цIуд.
КIандач фикир гуз яшариз,
Яб гуз кIанда шад къушариз,
Багъишламишрай рушари,
Пудкъанни цIуд, пудкъанни цIуд.
Гуьгьуьл ханвайла…
РикIи гатаз хурун кьефес,
Гуя жезва эхир нефес,
Са кардизни амач гьевес,
Агь зи яшар, фейи вахтар…
Япарин сес, вилерин экв,
Сивевай мез хьана пелтек,
Иштягь амач недай хуьрек,
Агь зи яшар, фейи вахтар…
Сефил авазар
Виждансузри гузва къе кIур
Пак адетриз бубайрин.
Майдандалла, экъисна хур,
Эсерсузар тубайрин.
Къвез ви пеле атIумда гъил,
Вилик тефин паталди.
Вучиз ятIа икьван пехил
Инсанар сад — садалди.
Гьаким Къурбаназ
Гуьгьуьлдаваз тIурфанни хар,
Руьгь ийизвай кьатIар-кьатIар,
Ивидалди кхьей цIарар
Ватандикай я.
Лагь, вучиз къе, садбуру къвез,
Ви сабурдал атIузва гез?
Артух хьунухь рикIе гъерез
Виждандивай я.
Муьгьуьббатдикай цIарар
Са куьнални эвезнач вун вижданди,
Вун галачиз зи руьгь незва гьижранди,
Хтарар ви туьтуьнавай мержандин
Зав туна, вун гьиниз катна, кIаниди?
Кьил эцигна ви гъил хкIур ястухдал,
Бул накъварин миже хъвазва за тухдалд,
Я Сад Аллагь, зун туьш авур язухдал,
Зун туна, лагь, гьиниз катна кIаниди?
ТIвар кьацIурмир
Дуьзни патахъ гекъиг тийиз,
Яшаризни килиг тийиз,
СукIра гъиляй эциг тийиз,
Вун межлисрин кьиле хьана.
Хизандизни ганач на яб,
Хъелна, вакай хъфена паб,
Сагъ гуьгьуьлар ийиз хараб,
Вун азаррин гъиле хьана.
Халкьди негьна амалар ви,
ПичIибур яз хиялар ви,
Етим хьана аялар ви,
ТIвар жемятдин сиве хьана.
Ичкидикай хьанач вун тух,
Уьмуьр фена даим яз лух,
Ви чандикай туькIуьрна рух,
Халкьди кIур гуз, чиле хьана.
Лга Энвер, ЛГ-дин 2018-йисан 21-нумра
* * *
Заз багьа я ви гьар са цIар,
Яргъарайни гурай цIарцIар.
Сагъ хъжеда руьгьдин кьацIар
КIелдай чIавуз “Лезги газет”.
Чавди ийиз вичин сир — гъам,
Уяхариз гьар са авам,
Начагъбурни жеда хуррам
КIелдай чIавуз “Лезги газет”.
За авайвал лугьузва къе,
Са куьнвайни жедач эвез,
Дилавардиз рахада мез,
КIелдай чIавуз “Лезги газет”.
* * *
Дидедин чIал пак Кьуръандин гьайкал хьиз,
Вун дарман я заз зейтундин стIал хьиз,
ХупI ширин я вун заз багъри аял хьиз,
КIелзава за, рикIяй агъзур хиял физ.
«Лезги газетдин» 2019-йисан 4-нумрадай
__________________________________________________________
Чида чаз вун
Авачирда къадир тIуьр фан
Зи гуьгьуьлда тунва тIурфан.
Яна гъилер эчIез, кимел
Рахазва ам, хкажна ван.
Хьанач завай мад хуьз сабур,
Адан уьзягъвал акур,
Зи туьнт гафар, атай сивел,
Хьелер хьана кукIвардай хур:
— Садавни дуьз текъвер рекье,
Бул бархунар авай рикIе,
ЧIуру хъач яз чида чаз вун,
ЭкъечIнавай къуьлуьн никIе.
Жемятдиз вун туштIан виле,
Физ акъвазда къени кьиле,
РакIар квачир харчи сивел,
Гьикьван твада на чун хъиле?..
Бахшандар
Ахцегь райондин КЦСОН-дин директор Мусанабиева Мирварадиз
Кьуьзуь, жегьил, сагъди, набут,
АватIани мадни шумуд,
Мирварадик кутур умуд,
ТуькIуьрда ви кар и ваха.
Гуьгьуьл къачуз, кIватIиз къулав,
Теклифзавай ашни пулав,
КIубанвилиз гузвай къилав,
Къайгъуяр санбар я вахан.
Гьуьрметлу и дишегьлиди
Вичин рикIе виш эгьлидиз
Гуда чка, я сейлиди,
Эзберзавай тIвар и вахан…
* * *
Ахцегь райондин администрациядин культурадин хилен работник Эскерханов Саидаз
Пагь, хуш гафар къвезва мецел,
Кьарувализ лезги хцин.
Гъалибвилер къазанмишиз,
Аферинар гъизвай тIварцIел.
Шалбуз дагъдихъ элкъуьрна чин,
Къуччагъ хва я — Къуччагъ хуьруьн.
Мадни ава кьегьалар квехъ,
Къазанмишай генералд чин.
Лезги халкьдин таъсиб хуьдай,
Гьар женгина гъалиб хьурай.
Шарвилидин руьгь гваз даим,
Бул савкьатрин сагьиб хьурай.
Икрамда квез, юкь алгъурна,
За, Энвера, чIал гьазурна.
Хуш авазрал шад ийиз чун,
Къазанмишна виш агъзур на.
Ваз гьунарар ийиз тебрик,
Зунни, дуст кас, хьанва шерик.
Гьуьрметлу хва, стха Саид,
Тежез секин, алад вилик!..
«Лезги газетдин» 2019-йисан 21-нумрадай
__________________________________________________________________
Югъ я къе
Чирвилерин югъ малумна зенгини,
Эверзава илим къачуз женгиниз.
Вердишардай гьар са кар гъиз гуьнгуьниз,
Агалкьунрин диб эцигдай югъ я къе
МефтIерилай алахьиз бугъ,
Зегьемлуди ийиз гьар югъ,
Хазинадин чIехи сандух
Ачухзавай югъ я къе!
Кьарувилиз чи Ватандал,
Кеврек зугъ хьиз таран тандал,
Гъалибчи жез гьар са карда,
Алахъзавай югъ я къе!
ЦIийи жегьил цIирер санал,
Школадихъ гапIал-гапIал,
Гележегдиз гьевеслу гьал,
Артухзавай югъ я къе!
Сад духтур жез, сад инженер,
Ачухбур я гьарнихъ рекьер,
Уьлкве патал кIвадриз гьекьер,
Къуллугъзавай югъ я къе!
* * *
Акъат тийир гьайиф ава зи чанда,
Генг ерияр иессуз я Ватанда.
Зун лагьайтIа, “хуьруьнжув” луз патанда,
Руг нез рекьин къерехрава.
* * *
Мад вучда кьван, дуьнья я ман,
Садаз тIимил, садаз пара.
Хьайи чIавуз эхирзаман,
Садакайни техжер чара.
* * *
Ява верч хьиз, къваз тийиз мука,
Пата рухуз вичин кака,
Зи вилик къвез ягъиз къакъра,
ИкI хьайила вучда вуна?
* * *
Зегьмет квачир уьмуьр муьфте
Гьалда вуна, ягъиз уьфтер.
Куьз авач вахъ зерре намус,
Лагь, низ гана хийир на мус?!
* * *
Кьакьандавай эдеб, камал,
Рахазвайла кьве кас санал,
ГъалатI квачиз лезги чIалал,
Лап, хуш жеда заз и чIавуз!
Себеб вуч я?
Зирзибилар чувал-чувал,
Гъиз, ичIириз куьчед юкьвал,
Аквада квез мукьвал-мукьвал,
И кардин, лагь, себеб вуч я?!
Гьар камуна гьалтзава чал
Кьенвай лешер: кицIни кац, мал,
Патавай физ, тIиш кьаз патал,
И кардин, лагь, себеб вуч я?!
Баклашкани кьацIай пакет
Куьчейрал тун хьанва хесет,
Мийир-мийир амач адет,
И кардин, лагь, себеб вуч я?!
Гьафтейралди къачуна ни,
Хуьруьн къене таз кьацIаяр,
Бес и чиркер гадарда ни?
Мус гьатда крар кьацIа, яр?..
«Лезги газетдин» 2019-йисан 43-нумрадай
_________________________________________________________________________________________________
Лезги чIал
Ахцегьани, Къубадани, Куьреда,
Сулейманни Эмин рахай жуьреда,
Хан негь авур Саидан сес дереда,
Зи бейнидай акъатдач вун, лезги чIал.
Агъзур чIалан эвезда хьи ери на,
Мел-мехъерриз гьевес гуда демина,
Пагьливандиз майдан я вун симинал,
Чир хьухь, вавай къакъатдач зун, лезги чIал.
КьепIин кьилихъ ягъай лайлай дидеди
Каинатдиз пайдах хьанва эбеди,
Лап кьакьанриз хкажзавай леледи,
Вак тIурфандин тIем акатдач, лезги чIал!
Лукьман амач
Гьахъсузвилер аквазва къе виринрай,
Алахъзава яд рагъулиз деринрай,
Дяведин цIун куьгьне хирен иринрай,
КIуф экъуьриз, тIуьн кIанзава къузгъунриз.
Адалатдин кIус амачир сифетда,
Майдандалла гьатнавайбур нифретда,
ТIиш твазвайбур къвез чарадан девлетда,
АцIузвач нефс, бес жезвач ам азгъунриз.
Иман гузва, суракьдава амандин,
Меслят къачуз душмандивай дармандин,
Лукьман амач, тIал сагъардай ямандин,
Девир хьанва тек кIир авай дунгъузриз…
«Лезги газетдин» 2019-йисан 49-нумрадай
__________________________________________________________________
Зи яр я
(Мани)
Заз жагъанвай къизилдин кIус
Сир яз хуьда, тиртIа ам мус.
Кьакьандавай ягьни намус,
Ам зи кIани яр я, дустар!
Яйлах хьиз я цуькведавай,
Машгьурвални уьлкведавай,
Сив шекер хьиз некIедавай,
Ам зи кIани яр я, дустар!
Зун акурла, юзуриз кьил,
Милиз хъуьрез, шадиз гуьгьуьл,
Мани лугьуз жеда билбил,
Ам зи кIани яр я, дустар!
Заз чин чIурун чидач адаз,
Зи туьнтвални кьадач гьич кваз,
Улам чидай дерин, даяз,
Ам зи кIани яр я, дустар!
Къвалавай физ, эвяда мез,
КIан жеда зун вилерив нез!
Дуьшуьш хьана, акуртIа квез,
Чир хьухь, ам зи яр я, дустар!
«Лезги газетдин» 2020-йисан 2-нумрадай
_____________________________________________________________
ЭкъечIмир къецихъ!
Сиясатдиз чуьруькдин тIвал,
Вакай хьанва залум тIугъвал.
Инсаният тазвач секин,
Туна гьардан рикIе са кин.
Саралай из ивид паргъа
Ийизва чун чавай яргъа.
Гъизва уьлкве регъуьз ухшар,
Амачир гъуьр тини тIушар.
ХупI мягькем я къе ви белге,
Гъулгъуладиз гъизвай уьлкве,
Язух халкьдал ясдин куьлге,
Рагъ кьванни чаз къалур куьне?
Ава ам гуз буйругъ вичин,
Квекай я гьаясуз ви чин?!
Дуьнья тирвал на гуз чаз рум,
Чанарикай ийизва магьрум.
Цаварал — Аллагь, чилерал — Гьаким,
Гьарда са жуьре ийизва тагьким:
Къалурмир на кьил, экъечIмир къецихъ,
Гьикьван жен кIвале къарих яз къецихъ.
Къе сивевай виридан луькIуьн:
“Коронавирус, вун я тIегъуьн,
Гьар камуниз агъзур къекъуьн.
Сергьят атIуз часпар мегъуьн”.
Яр-дустунихъ хьанва цIигел,
Патав къведай амач цIи гел,
ГъвечIи вирус — завал чIехи,
Илисда цIукI за вал эхир!
«Лезги газетдин» 2020-йисан 24-нумрадай.
___________________________________________________________________
Вакай бейкеф акунач
Ахцегьрин ЦРБ-дин хирургиядин отделенидин медсестра Аликъулиева Синьорадиз
Пагь, хесетриз икьван хъсан,
Акурди туш ихьтин инсан,
Сабурлувал винедавай,
Акьуллувал бинедавай.
Гъиле рабни памбаг аваз,
Чи уьмуьрда цIийи кваг тваз,
Лап инсанрин инсан я ам.
Сагъламвилиз лейсан я ам.
* * *
Бахтавар я, бахтлу хьурай вун мадни,
Вакай бейкеф акунач заз гьич садни.
Уьмуьр патал кьиле физвай женгина,
Вун куркур я сес къати из зенгина!
* * *
Намус, виждан дегиш тежер къуллугъ я,
Элдин гьуьрмет куьтягь тежер дуллух я,
Нефсни гъил хуьн хазинадин сандух я,
Нефс михьидан гъиле куьлег мягькем хьуй!
* * *
РикI пайзавай сергьятриз,
МефтIер гатаз нянетри,
ЧIал квахьзавай миллетрин
Къайгъуда бес вуж хьурай?!
РикI хана
Кас аквазмач гьил къакъажна кIвалахдай,
Са гьуьжеткар меслятдивди чIалахъдай.
Гуж гудайбур хьанва вири,
Еке къванциз талакьдай.
Сад-садалай усанва гьар югъ,
Пакадин йикъак гьикI кутан умуд?!
Гуьгьуьлда даим тIурфанни хар, юргъ.
МефтIер гатазва зигьин из набут.
* * *
Ярар, дустар яргъаз хьана,
РикI кьве патахъ аваз хьана,
Арада сергьят цаз-цаз хьана,
Вакай, дуьнья, зи рикI хана.
* * *
Гьерекатар зайиф,
Берекатар гьайиф,
Са кар амач алай тариф,
Дуьнья, лагь вун куьз икI хьана?!
Жеда зун
Дуст акурла шад жеда зун,
Цуьквед дибдиз яд жеда зун.
Мягькемариз Ватандин герб,
Чатухъандиз чад жеда зун.
Гьар са карда фад жеда зун,
Гатун багъдиз дад жеда зун.
Мягькем кьуна куьрпедин кьеб,
Лайлайдин баяд жеда зун.
Са угърашди…
Марифат куьз жезватIа кур,
Акваз-акваз инсанрин?
КIула аваз парар агъур,
Къекъвезва бул нукьсанрин.
Са Аллагьсуз угърашди
Хур атIузва дидедин.
Къарагь, алем, тамаш де,
“Гьахъ” вахкузва некIедин!
Къайгъусуз куьз хьанва куьн,
Инсан лагьай тIвар алаз?
И йикъал ни гъанва куьн?
Яшамиш хьухь зар алаз!
Вафасуз
Куьз къакъатна вун фад завай?
Лугьузва къе, цIугъиз, за “вай”.
Лагь, вучиз икI къакъатна вун?
Вафасуз, на кьве къатна зун,
Тапарарна вуна закай,
Вуч чара ин за хирез кай?..
«Лезги газетдин» 2021-йисан 2-нумрадай.
___________________________________________________________________________
