Алай йисан 12-майдиз Москвада вири дагъустанвийрик ажугъ ва къалабулух кутур вакъиа кьиле фена: Новоан­дреевский муькъвел арадал атай чуьруькдин нетижада вичин ери-бине Мегьарамдхуьряй тир Сеченован тIвару­нихъ галай медакадемиядин 2-курсунин студент Амир Абумуслимов гатана. Бедендиз хьайи хасаратвилерик 18 йис хьанвай студент тади куьмекдин машинда аваз шегьердин Н.И.Пирогован тIва­ру­нихъ галай 1-нумрадин больницадиз агакьарна. Амиран кьилиз хирургиядин жигьетдай гзаф муракаббурукай сад яз гьисабзавай 7 сятда давам хьайи опера­ция авуна. Духтурри къейд авурвал, жа­вандин мефтIедал иви (кровоизлияние мозга) ацукьнава. Гьелелиг ам вич-вичел хтанвач. Мукьва-кьилийри, чирхчирри вирида, Аллагьдик умуд кутуна, Амир вич-вичел хтун вилив хуьзва…

Амир больницадиз агакьарун патал тади куьмекдин машиндиз эвер гайиди и дуьшуьшдин шагьид хьайи Ирина Бахотская я.

“Зун уьмуьрдин юлдашни аялар галаз Горькийдин паркунай хъфизвай. Чалай са шумуд метрдин яргъа жегьилрин­ 8 касдикай ибарат кIеретI акъвазнавай. Абуру чпиз ерли таниш тушир гададиз кичIерар гузвай. Чун саки абурун патав агакьайла, кIеретIдикай сада гъутувди гададин кьил яна. Ам явашдиз чилел алукьна. Зи уьмуьрдин юлдаш, вич-вичикай хкатнавай гада метIерал эцигна, адаз куьмекиз алахъна. За тади куьмекдиз ва полициядиз зенг авуна. Тахсир квай кIеретIди катиз тади къачузвачир. Абур арадал атанвай гьалариз секиндиз килигзавай, хъуьрезвай. Ахпа абур катна. Амиран дустуни — Никита Северова чаз хабар гайивал, абуру кьведани медакадемияда кIелзава. Са акьван яргъа тушиз общежитида яшамиш жезва. Кьведни нянихъ сейрдиз экъечIнавай. Гадайри чпин кьилел ихьтин дуьшуьш къведа лагьана гьич фикирни авунвачир…”, — лугьузва Иринади.

Амиран хала Алиса Кьасумовади журналистриз хабар гайивал, мектеб къизилдин медалдалди акьалтIарай жа­ван Москвада медакадемиядиз гьахьна. Адахъ гъвечIи чIавалай хирург жедай ниятар авай. Медицинадин рекьяй хъсан тежриба авай пешекар хьун патал­ Амира, кIелунрихъ галаз сад хьиз, Анна Федермессеран “Вера” фондунин хосписдани кIвалахзавай.

Вучиз ятIани, и дуьшуьшдин гьакъиндай уголовный дело гьасятда, 12 майдиз, я гьич тахьайтIа, пакадин юкъуз къарагъарнач. Гуьзчивал тухун патал муькъвел кардик кутунвай видеокамерайрин записарни полициядин къуллугъчийрин гъиле гьасятда гьатнач. А.Кьасумовадин гафаралди, абурун ерини са акьван хъсанди тушир. Эхирни уголовный дело Амиран диде-буба Москвадиз атайдалай кьулухъ — 15-майдиз къарагъарна ва шак физвайди кьуна. Ам Узбекистандин агьали Анвар Батиров я. Ада вичи авур кIвалахдин патахъай гьайиф чIуг­вазвайди къейдна ва Амиран мукьва-кьилийривай гъил къачун тIалабна.

Амма кьуру гафаралди жазадихъай катиз жедач. Россиядин МВД-дин Моск­вадин Хамовники райондин силисдин от­делди РФ-дин УК-дин 111-статьядин бине­­даллаз (кьил-кьилеллаз маса касдин сагъламвилиз еке хасаратвилер авун) уголовный дело къарагъарнава. А.Батирован тахсиркарвал субут авуртIа, адаз 10 йисал къведалди кар атIун мумкин я.

Судда А.Абумуслимован итижар хуьзвай адвокат Темирлан Жилова малумарайвал, 18 йис хьанвай Анвар Батиров ММА-дин спортсмен я. Виликдай ада какахьай жуьредин акъажунра иштиракзавай. Спортдин “Легион” клубда вердишвилер къачузвай узбек гьасиррал агалай турниррин сергьятра аваз экъечIзава. Адан мукьва-кьилияр силисдихъай и делил чуьнуьхиз алахъна­вай, амма алакьнач.

Амиран кьилел атанвай дуьшуьшдикай хабар хьанмазди, РФ-дин Госдумадин­ депутатар Бувайсар Сайтиев ва Ризван Къурбанов гада къаткурнавай больницадиз атана духтуррихъ, мукьва-кьилийрихъ галаз рахана. Абуру чеб вири ре­кье­рай куьмекар гуз гьазур тирди къалурна.

Вахтуналди Дагъустандин Кьилин везифаяр тамамарзавай Владимир Васильева Москвадин ГУВД-дин руководстводивай дагъустанви студент Амир Абумуслимов гатунин гьакъиндай къарагъарнавай уголовный дело хсуси гуьзчивилик кутун тIалабна. И дуьшуьшдикай Москвадин мэр Сергей Собяниназни хабар ава.

Владимир Васильева Амираз сифтегьан куьмек гайи Ирина Бахотскаядиз ва адан уьмуьрдин юлдашдиз чухсагъул малумарна.

И йикъара Амиран мукьвабурухъ галаз Анвар Батирован чIехи стха Алишер гуьруьш хьана. Ада диде-бубадивай, мукьва-кьилийривай, Дагъустандин халкьдивай чпикай хъел татун тIалабна ва чеб алакьдай вири куьмекар гуз гьазур тирди къейдна. “Зи стхади авунвайди багъишиз жедай кар туш. Ада къанун­дин вилик жаваб гуда ва жазани чIугва­да”, — лагьана Алишер Батирова.

Амир Абумуслимоваз пулдин куьмек гун патал (больницадин игьтияжриз, раб-дармандиз ва маса месэлайриз) адан диде-бубади Сбербанкда махсус счет ачухнава. Мумкинвал авай гьар садавай Сбербанкдин картадин агъадихъ галай нумрадиз пул рекье тваз жеда: 4817 7600 8766 2510. Картадин иеси Амиран диде Нарима Абумуслимова я.

Играми ватанэгьлияр! Пака вичин кьилел вуч къведатIа гьич садазни малум туш. Къе Амиран кьилел бедбахтвилин дуьшуьш атанва. И четин ма­къам­да чна гьар сада адан хизандиз алакьдай куьмек ганайтIа, хъсан жедай. Къуй Амир фад-фад кIубан хъхьурай! Адан ди­де-бубадин, мукьва-кьилийрин рикIе­риз Аллагьди сабурар гурай.

Агьмед Магьмудов