28-майдиз Ахцегь погранкъуллугъдин аскерри чпин пешекарвилин сувар ва уьлкведа сергьят хуьнин кьушунар арадал атунин 100 йисан юбилей гурлудаказ къейдна. Шадвилин мярекатда Ахцегь, Докъузпара, Рутул районрин руководителри, ветеранрин Советрин, къайдаяр хуьдай органрин, общественный тешкилатрин векилри ва теклифнавай маса ксари иштиракна.
Сятдин цIуд. Сергьятчийрин плац-майдан. Шагьвардал РФ-дин пайдахри лепе гузва. Параддин партал алай аскерар, десте-десте хьана, кьиле чпин командирарни аваз низамда акъвазнава. РФ-дин ФСБ-дин погрануправленидин Ахцегь погранкъуллугъдин начальник, полковник Равиль Хисаметдинов рахазва:
— Гьуьрметлу сергьятчияр, мугьманар! Россиядин сергьят хуьдай кьушунар Совнаркомдин махсус Декретдин бинедаллаз 1918-йисан 28-майдиз арадал атана. Гьа чIавалай инихъ, ингье къе 100 йис я. Вири и девирда сергьятчийри, чIехи несилрилай атанвай баркаллу адетар вафалувилелди давамаруналди, уьлкведин сергьятар мягькемдиз хуьзва. Халкьдин ислягь зегьмет хуьнин пак карда чи пара юлдашри жегьил чанар гуналди чпин тIварар уьлкведин тарихда тунва…
Государстводин уях къаравулар тир сергьятчивилин къуллугъ гьамиша сейли я ва итимриз хас и пешекарвилел чна дамахзава. И пешеди аскердивай кьетIен викIегьвал, адалатлувал, руьгьдин мягькемвал, намуслувал истемишзава. Уьлкведин сергьятар чкадин властрин, жемятдин куьмек галачиз хуьз хьун мумкин туш. “Сергьят вири халкьди хуьзва” — гьахълу келима я. Алай вахтунда чна Ватандин сергьят Ахцегь, Докъузпара, Рутул ва Мегьарамдхуьруьн районрин жемятдихъ галаз сада-садаз куьмекунин рафтарвилералди хуьзва…
Сергьятчийриз сувар “Ахцегь район” муниципалитетдин кьилин заместитель Алмас Шуаева, Докъузпара райондин кьилин заместитель Салегь Гьажимурадова, Ахцегь Рутул ва Докъузпара районрин военкомиссар Рафик Мегьамедова ва маса юлдашри тебрикна ва сергьятчийриз суварин савкьатар гунихъ галаз санал Ватан хуьнин четин ва баркаллу къуллугъдай чухсагъул лагьана, аскерринни чкадин жемятдин арада гьуьрметлувилинни ихтибарлувилин алакъаяр гележегда мадни мягькем жедайдахъ инанмишвална.
Погранкъуллугъдин начальник, полковник Равиль Хисаметдинова сергьятчивилин везифаяр чешнеллудаказ тамамарзавай са жерге аскеррив РФ-дин погранкъуллугъдин командованидин патай “РФ-дин погранкъуллугъдин 100 йис” знакар, гьуьрметдин грамотаяр вахкана.
Шадвилин мярекат сергьятчи кьушунрин дестеяр плац-майдандал низамда аваз къекъуьналди, сергьятдал алай чи районрин культурадин кIвалерин гьевескар артистрин концертдин программадалди (Фикрет Баширован, Таира Муспаховадин, Эмирсултан Бигееван ва ашукь Шемширан манияр иллаки бегенмиш хьана) ва нянихъ жегьилрин “Самур” комплексда суварин тIуьн-хъунралдини ял ягъунин серенжемралди давам хьана.
Дашдемир Шерифалиев
