Алай вахтунда Госавтоин­спекциядин къуллугъчийрик яшар тамам тахьанвай аялар улакьра аваз санай-масаниз тухунин тегьерди еке къалабулух кутазва. ГьикI хьи, гзаф диде-бу­байри чпин улакьра аялрин креслояр хьун лазим тирди кваз кьазвач.

ИкI, Махачкъалада алай йи­сан алатнавай варцара 18 йисал къведалди аялрин иштираквал аваз 23 авария хьана. Абурун не­тижада 25 аялдал хирерни кьа­цIар хьана. Алатай йисан талукь девирда лагьайтIа, арадал атай 13 авариядин нетижада -16 аялдал. Статистикади къалурзавайвал, ДТП-яр саки кьве сеферда артух хьанва. Идахъ галаз сад хьиз, ав­томашинра крес­лояр ава­чиз хьуникди, аялар сад-са­да акьур дуьшуьшарни гзаф жезва. Гьаниз килигна Рос­сия­­дин УМВД-дин Махачкъалада авай ОГИБДД-дин къуллугъчийри 12-майдилай 12-июндалди Махачкъалада “Аялдин кресло” серенжем кьиле тухузва.

Тежрибади къалурзавайвал, гзаф диде-бубайри машинда аялрин ха­тасузвал таъми­нарунин месэлайриз лазим ­кьадар фикир гузвач. Абурун чIехи паюни чпин балаяр, аялрин бах­чадиз тухузвай рехъ са шумуд де­кьикьадинди я лугьуналди, машинда креслояр авачиз тухуз-хкизва. Амма диде-бубайри гьа и са шумуд де­­­кьи­кьани аялрин сагъламвал ва уьмуьр патал ­хаталубур хьун мумкин тирдакай фикирзавач. Бя­­зи диде-бубайри лагьайтIа, ма­шинда кресло аватIани, аял вичин патав гвай чкадал ацукьарзава. Я та­хьай­тIа, автокреслода ацу­кьа­райлани, ам кIеви ийиз “ри­кIе­лай ракъурзава”. И карди автокресло ишлемишун гьаваян кар­диз элкъуьрзавайди аннамишзавач.

Мурад Жапаров, Россиядин УМВД-дин Махачкъалада авай ОГИБДД-дин

пропагандадин рекьяй старший инспектор