Дагъустандин здравоохраненидин министерстводин пресс-къуллугъди хабар гузвайвал, аялрин чIулав лекьин азарар фад дуьздал акъудун патал Республикадин перинатальный центрада алай аямдин (суперсовременный) тадаракдикай менфят къачуз башламишнава. Ада куьрпе аялрин ивидик квай аммиакдин кьадар чирдай мумкинвал гузва. Малум хьайивал, цIийи тадарак маса къачуз мергьяматлувилин “Жизнь как чудо” фондуни куьмекна…
Техникадилай гъейри, медицинадин рекьяй пешекар кадрияр герек тирвиляй, мукьвара Дагъустандиз мугьман хьайи адан регьбердихъ галаз гуьруьшмиш хьайи РД-дин здравоохраненидин министр Т.Беляева и рекьяй пешекар кадрияр гьазурунин жигьетдай икьрар хьана.
— Фондунин “ЧIулав лекьин азаррай школа” программадин сергьятра аваз чун Дагъустандин перинатальный центрайрин ва аялрин больницайрин къуллугъчияр кьабулиз, абуруз куьрпе аялрин чIулав лекьинин азарар (гипераммониемия) фадамаз дуьздал акъудиз куьмекдай чирвилер, тадаракдихъ галаз кIвалахдай къайда чириз гьазур я, — къейдна мергьяматлувилин фондунин регьбер Анастасия Черепановади.
Вичин нубатдай министрди республикадиз коммерциядинбур тушир тешкилатрин регьберар, кардалди куьмекар гуз гьазур ва регионра медицинадин куьмек хъсанаруник чпин пай кутазвай инсанар атунал шад тирди лагьана. Алай йисан 6-октябрдиз Махачкъалада фондуни медицинадин федеральный идарайрин къуллугъчияр кIватIуналди конференция кьиле тухун, анал тухумда авай (наследственный) азаррин, кьилди къачуртIа, ивидик аммиак артух хьуниз талукь темадай тежриба хкажун пландик квайди раижна.
РикIел хкин: мергьяматлувилин “Жизнь как чудо” фондуни чIулав лекьинин залан азарар авай аялриз 2009-йисалай куьмекзава, гьа гьисабдай яз азар фадамаз чирдай программайрин бинедаллаз духтурриз чирвилер гузва.
Вилик пад кьун патал
Дагъустандин медицинадин идарайрив виниз тир технологийрин тадаракар агакьун давам жезва. Винидихъ тIвар кьунвай чешмедин делилралди, и йикъара Махачкъаладин клиникадин больницадиз “Здравоохранение” милли проектдин сергьятра аваз алай аямдин ангиограф хканва. ЦIийи тадаракди рикIинни дамаррин азаррин вилик пад кьаз куьмекда.
Чи мухбир
