РФ-дин Президент В.В.Путина уьлкведа тамам тушир мобилизация малумарунихъ галаз алакъалу яз, чкайрал махсус оперштабар тешкилна, талукь кIвалах активламишнава. ИкI, Ахцегь райондин кьил Осман Абдулкеримован регьбервилик кваз ва Ахцегь, Рутул, Докъузпара районрин военный комиссар Рафик Мегьамедован, хатасузвал хуьнин рекьяй райадминистрациядин кьилин заместитель Роберт Гьамзаеван, райсобранидин председатель Абдулкерим Палчаеван, РФ-дин МВД-дин “Ахтынский” отделдин начальник Эльдар Ибрагьимован, гьакI хуьрерин кьилерин иштираквал аваз райадминистрацияда гьар юкъуз мобилизациядин комиссиядин оперативный заседанияр эверзава. Абурал тамам тушир мобилизациядин гьакъиндай арадал къвезвай месэлаяр гьялзава, кьилин фикир жемят уьлкведа арадал атанвай гьаларин гъавурдик дуьздаказ кутуниз гузва.
Ахцегь РВК-ди, чи Ватандин азадвални аслу туширвал хуьз гьазур са шумуд десте гьазурна, рекье тунва ва и кар гьар юкъуз давамарзава. Ватан хуьз физвай кьегьалар, диде-бубайрилайни мукьва-кьилийрилай гъейри, райондин руководстводи ва общественный тешкилатрин векилри руьгьламишдай келимайралди рекье твазва.
Военный комиссар, подполковник Рафик Мегьамедова къейд авурвал, армиядин жергейриз, сифте нубатда, яракьлу къуватра иштиракна, запасда авай, тежрибалу, яни душмандин хура акъвазиз гьазур, медкомиссиядай акъатзавай ксариз эверзава. И месэлада иллаки хуьрерин администрацийрин ва участковый полицейскийрин куьмек важиблу я.
— Повесткаяр къвезвай жегьилар къе дуьньядин гьаларин ва чи уьлкве гьатнавай четинвилин гъавурда хъсандиз ава. Ватан хуьнин пак буржи кьиле тухуз абур гьазур я. Бязибур чпин хушуналди къвезва ва амайбурни руьгьламишзава. Вири хъсандиз гъавурда акьуна кIанда хьи, Россиядин ватандашар яз, Ватан душмандин къурхулувилик акатай вахтунда чун ам хуьниз мажбур я. КIвал, хизан — Ватан хуьн гьар са итимдин пак буржи тирди аннамишна кIанда. И жигьетдай заз хуьрерин кьилериз жемятдихъ, армиядин жергейриз эверзавай жегьилар авай хизанрихъ галаз гъавурдик кутунин кIвалах активламишуниз, яшайишдин месэлайра мумкин тир куьмекуниз эвер гуз кIанзава, — лагьана Рафик Гъажиагъаевича.
Дашдемир Шерифалиев
