Дагъустан Республикадин Гьукуматдин Председатель Абдулмуслим Абдулмуслимова и йикъара Махачкъала шегьердин Ленинкент поселокда медицинадин кислород гьазурдай “Трастфарма” ООО-дин завод ачухунин шадвилин мярекатда иштиракна. Ам Кеферпатан Кавказда кислород акъуддай сад лагьай кархана я.
“Алатай йисара эпидемиологиядин муракаб гьалар арадал атайла, начагъбурун кьадар гзаф жез, тIугъвал гегьенш хьайила, Дагъустандин медицинадин идараяр патал кислород лап кьит шейиниз элкъвена. Гьар суткада медицинадин идарайра 30 тонн кислород ишлемишзавай. Бес тежезвай 12 тонндив агакьна кислород Волгограддай, Таганрогдай ва масанрай гъуниз мажбур жезвай. Бязи вахтара лап кIеверани гьатзавай. Гьавиляй гьукуматди чкадал технический ва медицинадин кислород акъуддай серенжемар кьабулна”, — лагьана А.Абдулмуслимова.
Карханадин вири тадаракар тамамвилелди кардик акатайла, йиса 1,8 агъзур тонн кислород акъуддай мумкинвал жеда. Республикада жуван кислород хьуни медицинадин идарайрин кIвалах вилик тухуда ва хъсанарда.
«Лезги газет»
