27-сентябрдиз Дагъустандин Кьил Сергей Меликов “НоваВинд” АО-дин генеральный директор Григорий Назаровахъ галаз гуьруьшмиш хьана. Идакай РД-дин Кьилин пресс-къуллугъди хабар гузва.
Абуру гарун энергетикадин хиляй кьве патазни хийир жедай гележегдин кIвалахар веревирдна. Гуьруьшдин нетижада С.Меликовани Г.Назарова 315 МВт-дал кьван къуват авай гарун электростанция эцигунин проект уьмуьрдиз кечирмишунин икьрардал къулар чIугуна.
“И месэлаяр чи республика патал метлеблубур я, гьикI хьи, Дагъустанди эхиримжи йисара арадал гъизвайдалай артух энергия ишлемишзава ва и жигьетдай эксиквал гьиссзава. Гьа са вахтунда энергогенерациядин хиляй чи региондихъ еке тежриба ва мумкинвилер ава”, — къейдна региондин регьберди.
Гарун чIехи электростанция эцигуниз 50 миллиард манатдив агакьна такьатар чара ийида, идакай 3 миллиард манат кьван инфраструктура цIийи хъувуниз серфда. Проект кьилиз акъудунив 2023-йисуз эгечIдайвал я.
«Лезги газет»
