Къанунда дегишвилер
РФ-дин Президент Владимир Путина военный къуллугъдиз талукь УК-дик дегишвилер кухтуна. Идакай “Новости” РИА-ди хабар гана.
“РФ-дин Уголовный кодексдик ва РФ-дин уголовно-процессуальный кодексдин 151-статьядик дегишвилер кухтунин гьакъиндай” федеральный къанун правовой информациядин сайтда чапнава. ИкI, УК-дик “Мародерство” цIийи статья кухтунва. И тахсиркарвиляй 6 йисалай 15 йисал кьван азадвиликай магьрумунин жаза гуда.
Мад са дегишвал — “Гуьгьуьллудаказ есирвиле вугун”. И кардай 3 йисалай 10 йисал кьван азадвиликай магьрумунин жаза тайинарнава. Эгер и тахсиркарвал сифте яз авур аскерди вич азад хъувунин серенжемар кьабулайтIа, вичин къуллугъзавай чкадал хтайтIа ва есирвиле маса тахсиркарвилер тавуртIа, ам жавабдарвиликай азад авун мумкин я.
Дезертирвал авуртIа ва я эвер гайила, военный къуллугъдал татайтIа, 5 йисалай 10 йисал кьван азадвиликай магьрумунин жаза къведа. Запасда авай ва военный сборриз эвер ганвай аскеррин хивени икьрардин бинедаллаз къуллугъзавайбурун хьтин жавабдарвал гьатда. Идалайни гъейри, аскервилин буйругъ кьилиз акъуд тавунайни, женгинин гьерекатра иштиракуникай кьил къакъудунайни, военный къуллугъдин начальникдиз аксивилер къалурунайни, къуллугъ авунин къайдаяр чIурунайни, военный эменни квадарунайни жавабдарвал мягькемарда.
Бязи дегишвилер госзаказдин икьрарар тамамарунизни талукь жеда, икьрардин шартIар чIурун тикрарайтIа, 4 йисалай 8 йисал кьван азадвиликай магьрумунин жаза къведа, эгер тапшуругъ кьилиз такъудайтIа ва я гайи зарар вад миллион манатдилай тIимил тушиз хьайитIа, — 5 йисалай 10 йисал кьван.
Эгер военный къуллугъдиз акси яз авур тахсиркарвилер яракьлу къалмакъалар авай, гьакI военный гьерекатрин шартIара, мобилизациядин ва я военный положенидин муддатда, военный вахтунда кьилиз акъуднаваз хьайитIа, гьалар заланарунинбур яз гьисабда.
Аксивилер алудда
РФ-дин Президент В.Путинахъ галаз Сочида кьиле фейи гуьруьшдал А.Лукашенкоди малумарна хьи, РагъакIидай пата ийизвай аксивилерал Россияди гъалибвал къачуда.
“Чи кар гьахълуди я. Гъалиб жеда! Чаз маса рехъ авач”, — лагьана А.Лукашенкоди. Абурун гуьруьш “Россия 24” телеканалди раижна.
Къейд ийин, кьве уьлкведин регьберар 26-сентябрдиз гуьруьшмиш хьана. Абуру РагъакIидай патан санкцийрикай, абурун хура акъвазуникай веревирдер авуна.
Референдумрин нетижаяр
ДНР-дин, ЛНР-дин, Херсондин ва Запорожьедин областрин избиркомри Россиядик экечIунин гьакъиндай 23-27-сентябрдиз кьиле тухвай референдумрин нетижаяр малумарнава.
ИкI, ДНР Россиядик экечIуниз сечкичийрин 99,23 процентди сесер гана, ЛНР экечIуниз — 98,42 процентди, Херсондин область экечIуниз — 87,05 процентди, Запорожьедин область экечIуниз — 93,11 процентди.
Жаваб гуда
Ирандин МИД-дин векил Н.Чафиди малумарнава хьи, эгер Украинади Ирандин векилханадин къуллугъчи аккредитациядикай магьрумайтIа ва Киевда авай дипломатрин кьадар тIимиларайтIа, жавабдин серенжемар кьабулда. Идакай “Новости” РИА-ди хабар гузва.
Къейд ийин, Россиядив яракьар агакьарнава лугьуз, и кар тестикьарзавай делилар авачтIани, алатай гьафтеда Украинадин МИД-ди Киевда авай Ирандин векилханадин къуллугъчийрин кьадар хейлин тIимиларда лагьанай.
Ирандин МИД-дин кьили къейднавайвал, уьлкве Россиядинни Украинадин арада авай къалмакъал пайгардик кухтунин терефдал ала.
КьетIи серенжемар
Францияда газдин къимет вини кIарариз акъатуникди яшайишдин бязи тешкилатри кIвалер централизованный къайдада чими авуникай кьил къакъудунин месэла къарагъарнава. Чкадин чешмейрал асаслу яз, идакай “Новости” РИА-ди хабар ганва.
Къейдзавайвал, багьа авунвай цIийи къиметдай газ маса къачуник гзаф агьалийрин тIем акакьдач.
Ижевскда мусибат
Удмуртиядин меркездин мектебда арадал атай мусибатдин агьвалатдилай кьулухъ РФ-дин просвещенидин министр С.Кравцова компьютерри ийизвай таъсир веревирд авуниз эвер гана, хабар гузва “Новости” РИА-ди. Ада ихтилат авурвал, Ижевскдин мектебда инсанриз гуьлле гайида компьютердин къугъунриз итиж ийизвай.
Силисдин комитетдин делилралди, мусибатдин агьвалатдин нетижада 17 кас (11 аял ва 6 чIехибур) кьена. 34 йисан яшда авай тахсиркардив кьве тапанчи гвай. Ам психиатриядин учетда авай. Гьужумайда гуьгъуьнлай вичин чандизни къаст хъувуна.
«Лезги газет»
