Алатай гьафтедин ял ядай йикъара Каспийскда, А.Алиеван тIварунихъ галай спорткомплексда, дагъустанви машгьур спортсмен, Олимпиададин чемпион Владимир Юмин рикIел хуьнин лишан яз, азаддаказ кьуршахар кьунай тухвай Россиядин ачух чемпионатда уьлкведин 33 субъектдай, гьакI Тажикистандай, Белоруссиядай ва Донецкдай тир 160-далай виниз спортдин ветеранри — гьасиррин устадри яшарин 7 категориядай чпин устадвал къалурна. Абурун арада виликдай дуьньядин, Европадин, гьакIни СССР-дин чемпионатра алакьунар къалурай, гъалибвилер къазанмишай спортсменарни авай.
Ачух чемпионатда спортдин са шумуд жуьредай вичин къуватар ахтармишзавай ва агалкьунар къазанмишзавай чи машгьур спортсмен-ветеран, ери-бине Кьурагьай тир Эрелар Фейзуллаева (88 кг-дал къведалди заланвал авайбурун арада, “Е” дивизионда) 1-чка кьуна. Мубаракрай!
РикIел хкин: Э.Фейзуллаев алатай йисан декабрдиз Москвада грэпплингдай кьиле фейи дуьньядин чемпионатда къизилдин медалдиз лайихлу хьана. Ам азаддаказ кьуршахар кьунай дуьньядин чемпионвилин тIварцIин сагьиб я. Грекринни римлуйрин жуьреда кьуршахар кьунай, дзюдодай ва самбодай (гьа гьисабдай яз алатай йисан апрелдиз Сочи шегьерда ветеранрин арада кьиле фейи уьлкведин чемпионатдани), Россиядин чемпионвилин тIварар ада са шумудра къазанмишна.
Чи мухбир
