Малум тирвал, Россиядин Федерациядин Президент Владимир Путина уьлкведа тамам тушир мобилизация малумарунин жигьетдай РФ-дин оборонадин министерстводини Яракьлу Къуватрин Генеральный штабди ганвай теклифдин тереф хвена. И месэладиз талукь Указдал В. Путина 21-сентябрдиз къул чIугуна.
Инал чаз уьлкведин агьалийрихъ элкъвена рахадайла, Владимир Путина лагьай гафарни гъиз кIанзава: “Ядерный яракьралди чаз кичIерар гуз кIанзавайбуруз тIурфан чеб галай патахъни элкъведайди чир хьун лазим я. Дуьньяда агъавал, чи Ватан пайи-паяр ийиз кIанзавайбурун вилик пад кьун чи тарихдин адетда, халкьдин кьисметда ава”.
Уьлкведин вири субъектра хьиз, мобилизациядиз талукь мярекатар Дагъустан Республикада, гьабурукай яз СтIал Сулейманан райондани кьиле физва. Райондин агьалийри Россиядин Федерациядин Президент Владимир Путинан тереф кIевелай хуьзва. Идан гьакъиндай райондин хуьрера, общественный организацийра, школайра ва масанра тухузвай мярекатри шагьидвалзава.
27-сентябрдиз райцентрадал, Россиядин халкьарин культурадин адетрин центрадин вилик квай гегьенш майдандал, Россиядин Яракьлу Къуватри Донбассда тухузвай женгинин махсус серенжемдин тереф хуьн яз, райондин образованидин управлениди райадминистрациядихъ галаз санал тешкилнавай митинг кьиле фена. Ана Агъа СтIал-Къазмайрин, Вини СтIалрин, Кьулан СтIалрин, Кьасумхуьруьн 1-нумрадин, ЦIийи поселокдин юкьван школайра кардик квай Юнармейцийрин, волонтеррин отрядри, школьникри, муаллимри иштиракна. Абурун гъилера Президент Владимир Путинан портретар, уьлкведин пайдахар, триколордин чIехи яргъи лентер, “Своих не бросаем”, “Мы за Россию”, “Нет нацизму” ва маса плакатар авай.
Россиядин Яракьлу Къуватри Украинада тухузвай женгинин махсус серенжемдикай, адан макьсаддикай, Донбассдин агьалийрин аксина Украинади тухуз хьайи миллетчивилин политикадикай, миллетчивилин къурхулувиликай куьрелди лугьуналди, митинг райондин образованидин управленидин начальникдин заместитель Къачабег Аминова ачухна. Россиядин Федерациядин Гимн яна. Мярекатдал мектебрин директорар ва маса ксар рахана. Абуру къейд авурвал, районда тамам тушир мобилизациядин кIвалах тешкиллувал аваз кьиле физва.
Чи мурад вири кьегьалар, гъалибвал къачуна, уьзягъдиз, сагъ-саламатдиз хтун я.
Хазран Кьасумов
