Играми ватанэгьлияр! Алай вахт чи виридан Ватан — Урусат патал акьалтIай кьетIенди, хаталувал авайди я: чи уьлкведиз Западдин хейлин уьлквеяр акси экъечIнава. Аксивал квекай ибарат я? Урусатдин экономика, яшайишдин жуьреба-жуьре хилер зайифарун патал акъваз тийиз санкцияр кьабулзава, Украинада авай нацистар яракьдал таъминарзава, чи уьлкведин агьалийрин гьакъиндай гьар жуьредин рекьерай сергьятар тайинарзава. Ибурал алава яз рикIе чIулав къастар авай къуватар халкьдин арада гъулгъула тваз алахънава. Гьа жергедай яз, Дагъустандани.

И йикъара Дагъустанда къанундал амал тавуна тешкилнавай са шумуд митинг кьиле фена. Къанун-къайда хуьдай органрин векилри кьабулай серенжемрин нетижада митингра кIватI хьайи дестейривай республикада авай гьалар пайгардикай хкудиз хьанач. Гуьгъуьнай малум хьайивал, вири и гьерекатриз къецепатан уьлквейрай регьбервал гузва. Пулдалди, хиве кьунралди ва маса рекьералди инсанар чпиз кIандайвал чIалал гъиз алахънава. И женгина чун вири сад хьана кIанда — пакадин югъ экуьди жедайвал.

Алай вахтунда РФ-дин Президент Владимир Путина уьлкведа тамам тушир мобилизация малумарнава. И кардин кьилин себеб чи Ватан, чи кьеб, муг душманрикай хуьн я. Эгер нацистрин вилик пад гиламаз кьун тавуртIа, пака абур чи чилеривни агакьда. Гьавиляй вагьши вичин магъарадин патав тергна кIанзава.

Дагъустанвияр неинки Урусатда, гьакIни адалай къецепатани викIегь, ягь-намус вине кьадай, баркаллу халкь яз чида. Гьам Ватандин ЧIехи дяведин йисара, гьам 1999-йисара дагъустанвийри Ватан хуьн патал акьалтIай викIегьвилер къалурнай. Исятдани гьакI я. Украинада кьиле физвай махсус операцияда вишералди дагъустанвийри иштиракзава, кьегьалвилер къалурзава. Нацистриз акси дяведа чи садвилелай гъалибвал аслу я.

Къе Ватандиз чун герекзава. Ватан кIеве гьатайла мегер кьулухъ акъваз жедани? Чна чи хайи кьеб, чил, муг хвена кIанда.

«Лезги газет«