Дагъустанда прунз гьасилунин кардихъ авай гележегдин месэлаяр 18-сентябрдиз Къизлярда кьиле фейи совещанидал веревирдна, хабар гузва РД-дин хуьруьн майишатдин ва недай суьрсетдин министерстводи.
Мярекатда РД-дин Гьукуматдин Председателдин заместитель Нариман Абдулмуталибова, региондин хуьруьн майишатдин ва недай суьрсетдин министр Мухтарбий Аджекова ва адан сад лагьай заместитель Шарип Шарипова, Къизляр райондин кьил Аким Микирова, РД-дин Федеральный аграрный илимдин центрадин директордин везифаяр тамамарзавай Нариман Ниматуллаева ва са жерге маса идарайрин руководителри, векилри иштиракна.
Нариман Абдулмуталибова республикада прунз гьасилунин карда виле акьадай агалкьунар хьанвайди къейдна. Ада хабар гайивал, алай йисуз Дагъустанда прунз икьван чIавалди садрани тахьай кьадар майданра — 30 агъзур гектардилай гзаф чилера цанва. Гьа са вахтунда и хиле четин месэлаярни авачиз туш.
“Вири и месэлаяр гьялиз жедайбур я. Кьилди къачуртIа, идалай вилик прунз гьасилунал машгъул чи лежберрихъ дигидай цихъ галаз алакъалу четинвилер авай, амма мелиораторрин нетижалу кIвалах ва и хилез республикадин руководстводи икьван чIавалди тахьай кьадар куьмек гунин нетижа яз, чи набататчияр целди тамамдаказ таъмин я”, — лагьана вице-премьерди.
Къенин йикъан делилралди, республикада прунз гьасилунал машгъул 9 майишат ава, санлай къачурла, и майишатра ам цанвай чилери 500 гектардилай гзаф майданар кьазва.
Ш.Шарипова къейд авурвал, Дагъустандин прунзчийри цадай тумарин жигьетдай арадал атанвай игьтияж уьлкведин кар алай НИИ-рихъ галаз сих алакъаяр хуьналди таъминарзава.
ГьакIни республикада прунз гьялунал машгъул 4 кархана кардик ква, санлай къачурла, абурухъ са сменада 250 тонн прунз гьялдай ва 65 агъзур тонн дуьгуь хуьз жедай мумкинвал ава.
М.Аджекова суьгьбет авурвал, 2022-йисуз регионда 135 агъзур тонндив агакьна бегьер вахчун гуьзлемишзава. Им икьван чIавалди садрани тахьай кьадар я. Гьа са вахтунда прунз цазвай чилерин кьадарни къвердавай артухардай фикир ава.
“Прунз цазвай чилерин кьадар исятда авай 30 агъзур гектардилай 40 агъзур гектардив агакьардайвал я. И кар патал мумкинвилер чаз са жерге районра аквазва. Зи фикирдалди, са шумуд йисан вахтунда чун и нетижадал агакьда. Амма илимдихъ галаз сихдаказ алакъада хьун, дуьгуь гьасилунин технология хъсанарун чарасуз я”, — малумарна министрди.
«Лезги газет»
