Эхиримжи вахтара Ахцегьа футболдин девирдин истемишунрив кьур чIехи майдан ва хуьрера школайрин базайрин бинедаллаз гъвечIи майданар кардик акатуникди районда футболдиз итиж ийизвай аялрин кьадар хейлин артух я. “Ахцегь район” муниципалитетдин кьил Осман Абдулкеримован къарардалди 2022-йисан 1-сентябрдилай “Ахцагь” стадиондин бинедал футболдин махсус школа ачухнава. Дагъустанда сифте яз тешкилнавай, вични райондин бюджетдай финансламишзавай спортдин кьетIен школа районэгьлийри хушдиз кьабулнава. Диде-бубайри чпин аялар куьчедин таъсирдикай хкатун, муаллимрин гуьзчивилик кваз сагъламбур хьун патал спортшколадик кутазва.
Ина парталар дегишардай кIвал, чIимел ва я мекьи вахтунда футболдин теориядай чирвилер къачудай махсус класс ва герек маса чкаяр ава. Гьамам туькIуьрна бегьемарзава. Жегьил футболистар акъажунриз тухун патал 18-20 чкадин автобусдин игьтияж ава. Футболдин школадиз спонсорвилин куьмекар гун, ам хуьн чи баркаллу ватанэгьли, машгьур футболист Мегьамед Алишева вичин хивез къачунва.
Директорвилин везифаяр “Ахцагь” командадин кьилин тренер Камил Гьажиевал тапшурмишнава. Алай вахтунда директор ва адан куьмекчи Гьажимурад Парпачев тешкиллувилин кIвалахрал, кьилди къачуртIа, алава образованидин цIийи школадиз аялар желбунал, махсус образование авай муаллимар-тренерар кьабулунал ва спортдин дестеяр тешкилунал машгъул я. Школада вири 8 тренер ва 18 десте, яни футболдин хъсан майдан авай гьар са хуьре 2 десте жеда. Девирдин истемишунрив кьур хъсан майданар, кьакьан дагъларин шартIарин Гутумар, Хинер, Фияр, Чепер ва Ялахъар квачиз, амай вири хуьрера ава. Тарифлу 8 майдандикай кьуд (Ахцегьрин 1-нумрадин школада, Къурукала ва кьвед Луткуна) гъилевай йисуз ачухнава. Алай вахтунда райондин руководстводин тапшуругъдалди футболдин вири дестеяр талукь тир тадаракралди таъминарзава. Районда футболдин школа кардик хьуникди, гьелбетда, чкайрал футболдин майданар лазим тирвал хуьниз ва ишлемишуниз таъсирда.
— Футболдин спортшкола кардик акатуникди районда спортдин и жуьре йигин камаралди вилик фидайдал, иллаки жегьилрихъ футболдай агалкьунар жедайдал шак алач. Исятда чна туькIуьрзавай махсус программадай, аялриз футболдал къугъваз чирунилай алава, абур спортдин, сагъламвилин ва ватанпересвилин тербиядин месэлайрайни ачух ва дирибашбур хьуниз кьетIен дикъет гузва. КIвалахдив эгечIай саки кьве гьафтеда чна, школайра къекъвез ва аялрин муаллимрихъни диде-бубайрихъ галаз рахаз, агъзурдав агакьна аялрикай 200 аял хкяна. Школада вири 260-280 аял жеда. Тарсар 1-октябрдилай тамамвилелди чпин къуватда гьатда. 25-сентябрдилай чна районда аялрин футболдин лига тешкилна кIвалахда. Адан сифте турнир — школьникрин чемпионат 30-сентябрдиз кьиле тухуда, — суьгьбетна чаз спортшколадин директор Камил Гьажиева.
Дашдемир Шерифалиев
