21-сентябрдилай уьлкведа тамам тушир мобилизация малумарнава
Урусатдин Президент Владимир Путина уьлкведа тамам тушир (частичный) мобилизация малумарунин жигьетдай РФ-дин оборонадин министерстводинни Яракьлу Къуватрин Генеральный штабди ганвай теклифдин тереф хвена. И месэладиз талукь Указдал В.Путина 21-сентябрдиз къул чIугуна.
Указдай малум жезвайвал, тамам тушир мобилизациядиз талукь мярекатар 2022-йисан 21-сентябрдилай кьиле тухуз эгечIнава.
“За чи Ватан, адан аслу туширвал, адан мулкар хуьн, чи халкьдин ва азад авунвай мулкарал алай инсанрин хатасузвал таъминарун патал Оборонадин министерстводи ва Генеральный штабди Россиядин Федерацияда са кьадардин мобилизация малумарунин жигьетдай ганвай теклифдин тереф хуьнин игьтияж авайди яз гьисабзава. Дяведин рекьяй къуллугъ авуниз алай вахтунда запасда авайбуруз, сифте нубатда уьлкведин Яракьлу Къуватрин жергейра къуллугъ авурбуруз, военный рекьяй тежриба авайбуруз эвер гуда”, — къейдна уьлкведин Президентди.
Уьлкведин агьалийрихъ элкъвена рахадайла, Владимир Путина лагьана: “Ядерный яракьралди чаз кичIерар гуз кIанзавайбуруз тIурфан чеб галай патахъни элкъведайди чир хьун лазим я. Дуьньяда агъавал ийиз, чи Ватан пайи-паяриз, муьтIуьгъариз кIанзавайбурун вилик пад кьун чи тарихдин адетра, халкьдин кьисметда ава”.
Къейд ийин хьи, тамам тушир мобилизациядин сергьятра аваз мобилизациядин ресурсрин тахминан 1 процент желбда. РФ-дин оборонадин министр Сергей Шойгудин гафаралди, уьлкведа Яракьлу Къуватра къуллугънавай, женгинин тежриба, дяведин рекьяй пешекарвал авай саки 25 миллион кас ава. Ада гьакIни алава хъувурвал, малумарнавай тамам тушир мобилизациядин сергьятра аваз къуллугъ ийиз 300 агъзур касдиз эвер гуда.
Агьмед Магьмудов
