Алатай киш юкъуз (17-сентябрь) республикадин жемиятди Каспийск шегьердин 75 йисан юбилейдин мярекат шад гьалара къейдна. Ана Дагъустан Республикадин Кьил Сергей Меликова, РД-дин Халкьдин Собранидин Председатель Заур Аскандарова, шегьердин тIвар-ван авай инсанри, жемиятдин жуьреба-жуьре организацийрин векилри, мугьманри иштиракна.
Каспийск шегьердин агьалийриз 75 йисан юбилей тебрик авунихъ галаз сад хьиз, Сергей Меликова и йикъара Россиядин Федерациядин Игит лагьай тIвар гайи Энвер Набиеваз государстводин чIехи шабагь мубаракна ва адаз рикIел аламукьдай пишкеш гана. Гьа са вахтунда РД-дин Кьили къейдна: “Заз къе Украинада кьиле физвай махсус серенжемда чи умуми кIвал тир Россиядин милли итижар дирибашвилелди хуьзвай ва аскервилин буржи жуьрэтлувилелди кьилиз акъудзавай Каспийскдин агьалийрихъ галаз санал чи республикадин вири шегьеррин ва хуьрерин кьегьалризни рикIин сидкьидай сагърай лугьуз кIанзава. Каспийск шегьердин ва Дагъустандин агьалийри гъалибвал патал чпелай алакьдай вири крар ийизва. Хайи маканрай катдай чкадал атанвай Донбассдин агьалийриз тоннралди гуманитарный куьмек рекье туна. Катнавай хейлинбур чи инсанри кьабулнава ва абуруз яшамиш жедай хъсан шартIар тешкилнава. Заз къе лайихлу ва викIегь хва тербияламишай чи Игитдин диде-бубадизни сагърай лугьуз кIанзава”.
Гьелбетда, хабар рикIик гьевес, шадвал кутадайди я. Лезги халкьдин векилри чеб гьар са майданда викIегь, жуьрэтлу, намуслу, Ватандиз вафалу инсанар тирди къалурна ва и кар къенин юкъузни успатзава.
Энвер Альбертович Набиев Каспийск шегьерда дидедиз хьана. Адан бинеяр Ахцегь райондин Чеперин хуьряй я. 2010-йисуз Къазандин танкарин командиррин кьилин училище куьтягьайдалай гуьгъуьниз ада Россиядин Федерациядин Яракьлу Къуватра къуллугъзава. Майордиз “Военный къуллугъда тафаватлу хьунай” III дережадин медаль ава. Россиядин армияда къуллугъиз 15 йисалай виниз я. РагъэкъечIдай патан военный округдин танкарин гвардиядин бригадада къуллугъзавай ротадин командир Энвер Набиеван викIегьвилер адан характеристикада къейднава.
Ана кхьенвайвал, 2022-йисан 24-февралдилай эгечIна ам гьужумдиз физвай кьилин дестедик квай. Адан макьсадни Чернобыль шегьердин къвалахъ галай патай Днепр вацIал алай муьгъ кьун, хуьн ва Припять шегьердин сенгеррай пад акъудун тир. И кар авурдалай гуьгъуьниз Набиевав маса тапшуругъ агакьна: Иванков-Бородянка галай патахъ еримиш хьун. Сводный взводдин командир Энвер Набиева къулай чкаяр хкяна ва гьужумна. Душмандиз хъсандиз ягъунар кьуна. Идалай гуьгъуьниз гьужум давамарна ва Бородянка шегьердиз гьахьна. Ина Энвер Набиев кьиле авай дестеди 50 неонацист ва пуд БМП тергна.
Майорди регьбервал гузвай взводди Киев-Житомир шегьредай мадни виликди еримишна. Березовка хуьруьн патав абур душмандин аскеррал ацалтна. Миллетбазрин вертолетди чибуруз хейлин зиянар гана. Взвод яракьралди, суьрсетдалди таъминарзавай колонна гьалкъада гьатна. Гьа и вахтунда медицинадин къуллугъдин капитан Сергей Сластина вичел хер хьанвайдакай ва женг чIугваз тежезвайдакай хабар гана. Энвер Набиев БТР-да акьахна, гьалкъада гьатнавайбурун куьмекдиз фена. Душмандин гуьллейрик акатнатIани, адалай гьалкъада авайбурун патав физ алакьна ва чпив гвай БМП-дин ва танкарин куьмекдалди аскеррин гьакъиндай къайгъу чIугуна. Кьуд сятда давам хьайи женгина миллетбазар тергна, гьалкъадай экъечIдай мумкинвални арадал гъана. Хирер хьанвайбур санал хкана ва абур госпиталдиз агакьарун патал вертолетдиз эверна. Кар алай къуватар къведалди, 5 юкъуз гъиле гьатнавай сенгер хвена.
Мад цIийи тапшуругъ: Николаевка хуьруьн патарив фин ва чи аскеррал вил алаз акъвазнавай душмандин дестеяр терг авун. 6 танк ва 3 БМП гваз фейи Набиеван регьбервилик кваз чи аскерри диверсантрин 6 десте тергна. Березовка хуьруьн патав душмандин командный пункт гвайдакай хабар хьайила, Энвер Набиева ам тахьай мисал авун кьетIна. ВикIегь аскерар галаз разведка тухвана, ахпа гьужумдай махсус план туькIуьрна ва танкарин гьар са взводдиз кьилдин тапшуругъ гана.
Майор Энвер Набиева пешекарвилелди регьбервал гайивиляй я техникадикай, я аскеррикай садни хкатнач. Хуьруьн юкьваз гьахьна, чи танкистри ара-ара хъсандиз мягькемарнавай сенгерар яна. Лап кIеве гьатнавайди чир хьайила, неонацистри чеб есирвиле вугана. И гьужумдин нетижада командный пункт кукIварна ва 61 кас есирвиле кьуна.
Бузовая хуьруьн патав гвайла, Набиевав разведкадин дестедин командирдилай абур гьалкъада гьатнавайдакай хабар агакьна. Майор, гежел тевгьена, куьмекдиз фена. Чкадив агакьдайла, Набиеван взвод душмандин минометрин цIук акатна. ВикIегь танкистри кьулухъ чIугунач, гъиле-гъил аваз душмандин минометар алай 4 чка, 3 БМП ва 2 танк къайдадикай хкудна. Миллетбазар кьулухъ чIугвадай чкадал атана. Ида Набиеваз душманди элкъуьрна кьунвай кIвализ гьахьдай ва анай разведчикар ахкъуддай, хирер хьанвайбур тади гьалда госпиталдиз агакьардай мумкинвал гана.
Россиядин Армиядин майор Энвер Набиеван викIегьвилер садни кьвед туш. Ада гагь танкуна, гагь БТР-да аваз Харьковдин областдин Куьгьне Салтов поселокда душмандин хейлин техника, бронироватнавай “Хаммер” автомобиль, минометар алай кьве пикап, десантрин десте алай БТР, зениткайрин “ОСА” установка тергна.
Махсус серенжемда къалурзавай кьегьалвилер фикирда кьуналди, РФ-дин Президент Владимир Путина вичин Указдалди чи ватанэгьлидиз Россиядин Игитвилин тIвар ганва.
“Лезги газетдин” редакциядин коллективди Энвер Альбертовичаз Игитвилин тIвар гун рикIин сидкьидай мубаракзава.
«Лезги газет»
