20-сентябрдиз РД-дин Кьил Сергей Меликов, Украинадин мулкара военный махсус серенжемда аскервилин буржи тамамардайла, телеф хьайибурун багърийрихъ галаз гуьруьшмиш хьана.
Сифте нубатда республикадин гьукумдарри телеф хьанвай аскеррин суьретрив цуьквер эцигна. Мукьва-кьилийриз, багърийриз рикIин сидкьидай башсагълугъвал гуналди, С.Меликова къейдна: “Чандилайни гъил къачуна, чи уьлкве, гзаф инсанар хуьзвай куь рухвайрал, стхайрал, бубайрал чна дамахзава. Махсус серенжем давам жез зур йисалайни гзаф я. Душманрин къастар, абуру Россиядиз къалурзавай аксивилер чаз аквазва… Уьлкведин часпаррин мягькемвал хуьнин женгера чи аскерар телеф жезва. Махсус серенжемда телеф хьайибуруни, исятда Ватан хуьнин кар давамарзавайбуруни чи уьлкведин итижар, азадвал патал женг чIугуна ва чIугвазва”.
Республикадин регьберди, телеф хьайи аскерар рикIел хкун яз, са декьикьада кисна акъвазун теклифна.
Гуьруьшдал Дагъустандин Кьили къейд авурвал, аскеррин хизанриз куьмекар гун патал мумкин тир вири крар кьилиз акъудда. С.Меликова рикIел хкайвал, СВО-да телеф хьайибурун мукьва-кьилийриз куьмек гунин къарар Россиядин Президент Владимир Путина федеральный дережада кьабулна. Алава хъувурвал, чкайрални жавабдар къуллугъчийри гьа и саягъда куьмекар гун герек я.
Государстводи ийизвай гьакъикъи куьмекрикай РД-дин военный комиссар, полковник Д.Мустафаева, РД-дин зегьметдин ва яшайишдин рекьяй вилик финин министр А.Магьмудова ихтилатна.
Чи мухбир
