Лагь зи ярдиз1
Уьмуьрлухда алат тийир хажалат,
Сефил кIвализ мугьман я лагь зи ярдиз.
Ирид йисуз2 рикIе хвейи аманат3,
Вич низ фена? — гьижран я лагь зи ярдиз.
Дад чин тийиз, какатай шей недалди,
Халкьаризни зи тIвар бедлем4 жедалди,
ЧIуру гафар япари[з]5[ван]6 къведалди,
Кьиникь гзаф хъсан я лагь зи ярдиз.
Сирер-савда7 чна санал авуна,
Ахмакь хьана, лагь, зун вичихъ агъуна.
Етим Эмин геж гъавурда акьуна, —
Гила вич заз душман я лагь зи ярдиз.
1862
___________________________
1 И шиир сифте яз 1962-йисуз Кьурагь райондин “ЦIийи уьмуьр” газетдиз Шамсудин Исаева кьурагьви Тагьир Абдурагьмановавай кхьейди я лагьана, 3 бендиникай ибарат тир “Лагь зи ярдиз” тIвар алай эсер хьиз сифте яз ганвай. 1987-йисуз “Литературадин Дагъустан” журналдин 3-нумрада и шиир кьвед лагьай сеферда акъуднавай. 1995-йисуз Гъ.Садыкъиди акъудай Е.Эминан шииррин кIватIалда Д.Мегьамедова жагъурай эсер хьиз и шиир пуд лагьай сеферда ганвай. И шиирда Эмина вичин яр масадаз гъуьлуьз фейидакай ачухдаказ лугьузва. Эсер шаирди Туькезбан масадаз гъуьлуьз тухвай 1862-йисан зулун сифте кьиляй кхьенва. Чна ам 1987-йисуз журналдиз акъатай жуьреда, герек тир баянарни галаз, инал гузва.
2 Туькезбан масадаз гъуьлуьз тухудайла, Е.Эмин адал ашукь яз ирид йис алатнавай.
3 Аманат — хуьн патал амай, тунвай затI.
4 Бедлем — инал: виляй аватайди.
5 Инал шиирдин 1987-йисан вариантда, гъалатI яз, “япарихъ” гаф кхьенва.
6 Шиирдин 1987-йисан вариантда инал “зи” гаф кхьенва. Чна ам цIарцIин манади истемишзавай “ван” гафуналди эвезнава.
7 Сирер-савда — чинебан ихтилатар.
(Етим Эминан и шиир чапдиз
гьазурайди ва адаз баянар гайиди Мансур Куьреви я)
