— Шекердин азар авайбуруз агъадихъ галай рецептди гзаф хъсан хийир гуда: са лимондин мижедик кака какадарна, хъсандиз тIур яна, экуьнахъ ичIи рикIелай хъвада. 9 лагьай юкъуз ивидик квай шекердин кьадар агъуз аватда.
— Бедендал як алай, чеб яхун хьана кIанзавай инсанриз агъадихъ галай пегьриз меслят къалурзава. Са газар, са апельсин, са ич. Апельсин, кIусар авуна, регъведа. Газарни ич ракьай яда. Ахпа вири сад-садак какадарна, чайдин са тIуруна авай вирт алава хъувуна, пуд юкъуз экуьнахъ, нисинихъ, нянихъ неда. Ихьтин къаришмадик витаминар кумукьун патал ам гьар юкъуз цIийиз гьазурда.
Кьуд лагьай юкъуз къаришмадихъ галаз рганвай картуфар ишлемишда. Вад лагьай юкъуз адетдин жуьредин тIуьн неда. И вахтунда михьи яд хъун меслятзава. Эгер и пегьриздал амал авуртIа, нетижа квез кIанзавай хьтинди жеда, гьикI лагьайтIа, а продуктрик калий, магний, ракь, А, Б ва Е витаминар гзаф ква.
— Гьар юкъуз ругунвай чугъундур ишлемишун гзаф хийирлу я. Адак иви михьи ийидай ва ратарин кIвалах хъсанардай гзаф хийирлу шейэр ква.
— ЧIарар иер хьун ва абур мягькемарун патал, гьар сеферда кьил чуьхвейла, чIарарилай лаврдин пешерикай гьазурнавай гьалима аладарун меслятзава.
— КIелен мичер (мокрица) хъчадикай псориаз азар сагъардай гзаф хийирлу дарман туькIуьриз жеда. Ам икI гьазурда: хъач як регъведай машиндай авадарна, миже хкудда. Ахпа адаз (сад хьтин паяр) эрекь алава хъувуна, гьар юкъуз фу недалди вилик чайдин са тIуруна авайди ишлемишда. Адакай гьакIни мазь гьазуриз жеда. Кьурурнавай хъач кофемолкада гъуьр хьиз куьлуь авуна, вазелиндик какадарда. Ахпа ам азар квай чкайривай гуьцIда. ГьакIни псориаз азар квайбуруз гьафтеда садра (2-3 сеферда хьайитIа мадни хъсан я) каш гун хийирлу я.
— Жалгъаяр тIазвайла, фа ва хуьрекдин содади куьмек гуда. 0,5 л. банкадиз са истиканда авай хкя нек цана, винелай банка ацIудалди силин фу куьткуьнна, чайдин са тIуруна авай сода алава хъувуна, ам 5-6 сятда чими чкада эцигда. Ахпа ам куьзна, арадал атай мижедикай тIазвай жалгъайриз компресс ийида.
— Вилерин экв зайиф хьанвайла, гьар юкъуз чайдин тIурунин са паюна авай таза фенхелдин тум ишлемишун хийирлу я. И набататди вилерин куьлуь дамарар кIеви хьуникай хуьда.
— Мазула азардик кьил тIазвайла, хуьрекдин са тIуруна авай цирицIрин куьлуь авунвай хилерал са истиканда авай ргазвай яд илична, 4 сятда тада. Ахпа гьар юкъуз йикъа пуд сеферда хуьрекдин 2 тIуруна авайди хъвада.
— КIвачерал таб акьалтзавайла, чайдин са тIуруна авай чичIекдин хъуьруьшрал са истиканда авай ргазвай яд илична, тада. Ахпа ам ксудалди вилик хъвада.
— Мекьивилелай азарлу хьанвайла, хрен ва вирт (сад хьтин паяр) сад-садак какадарна, йикъа 2 сеферда хуьрекдин са тIуруна авайди ишлемишда.
“Айболит” газетдай.
Гьазурайди — Надият Велиева
